کوالالمپور(این این آئی)دفاعی چمپئن بھارت متواتر دوسری شکست کے بعد یوتھ ایشیا کپ کرکٹ ٹورنامنٹ ٹائٹل کی دوڑ سے باہر ہو گیا جبکہ پاکستان، بنگلہ دیش، نیپال اور افغانستان کی ٹیموں نے سیمی فائنل کیلئے کوالیفائی کر لیا۔ ملائیشیا میں جاری ایونٹ میں منگل کو کھیلے گئے آخری لیگ میچز میں بنگلہ دیش انڈر 19 ٹیم نے بھارت انڈر 19، افغانستان انڈر 19 ٹیم نے

متحدہ عرب امارت انڈر 19 جبکہ نیپال انڈر 19 ٹیم نے ملائیشیا انڈر 19 کو شکست فاش سے دوچار کیا، گروپ اے میں بنگلہ دیش انڈر 19 ٹیم نے دفاعی چمپئن بھارت انڈر 19 کو ڈک ورتھ لوئس میتھڈ کے تحت 8 وکٹوں سے ہرا کر فتوحات کی ہیٹرک مکمل کی اور پوائنٹس ٹیبل پر ٹاپ پوزیشن پر قبضہ جما لیا، بھارت انڈر 19 ٹیم نے پہلے کھیلتے ہوئے 32 اوورز میں 187 رنز کا مجموعہ ترتیب دیا، بارش کے باعث بنگلہ دیش انڈر 19 کو فتح کیلئے ڈک ورتھ لوئس متیھڈ کے تحت 190 رنز کا ہدف ملا جو اس نے 28 اوورز میں محض 2 وکٹوں کے نقصان پر پورا کیا، پینک غوش نے 81 رنز کی عمدہ اننگز کھیل کر ٹیم کو فتح سے ہمکنار کرایا، یہ بنگلہ دیش کی مسلسل تیسری کامیابی اور بھارت کی متواتر دوسری شکست ہے، فتح کے ساتھ بنگلہ دیشی ٹیم سیمی فائنل اور بھارتی ٹیم ایونٹ سے باہر ہو گئی، ایک اور میچ میں نیپال انڈر 19 نے ملائیشیا انڈر 19 کو یکطرفہ مقابلے کے بعد 8 وکٹوں سے شکست دے کر سیمی فائنل کیلئے کوالیفائی کیا،

ملائیشین ٹیم 15.3 اوورز میں 45 رنز پر ڈھیر ہو گئی، 33 رنز پر ملائیشیا کا کوئی کھلاڑی آؤٹ نہیں تھا اور اگلے 12 رنز پر اس کی 10 وکٹیں گریں، 6 کھلاڑی صفر پر آؤٹ ہوئے، سندیپ نے 5 کھلاڑیوں کو آؤٹ کیا، جواب میں نیپال نے مطلوبہ ہدف 5.2 اوورز میں 2 وکٹوں پر حاصل کیا، گروپ بی کے آخری میچ میں افغانستان نے متحدہ عرب امارات کو با آسانی 134 رنز کے واضح مارجن سے شکست دی، اس کے ساتھ ہی افغانستان نے گروپ بی میں ٹاپ پوزیشن پر قبضہ جما لیا جبکہ پاکستانی ٹیم دوسرے نمبر پر رہی جس کی وجہ سے سری لنکن ٹیم ٹائٹل کی دوڑ سے باہر ہو گئی۔