لاہور(اے این این )وزیر اعلی پنجاب محمد شہباز شریف کی ہدایات پرعوام کو صحت مند اور معیاری خوراک کی فراہمی یقینی بنانے کے لیے پنجاب فوڈ اتھارٹی کا صوبہ بھر میں گندے نالوں، ٹیکسٹائل ویسٹ، اور دیگر زہریلے پانی سے اگنے والی سبزیوں کے خلاف کریک ڈاؤن جاری ہے۔ اس سلسلے میں پنجاب فوڈ اتھارٹی ٹیموں نے صوبہ
بھر کے تمام اضلاع میں زہریلے پانی سے اگائے جانے والی سبزیوں کے خلاف کاروائیاں کرتے ہوئے ،کیمیکل ملے، زہریلے، انڈسٹریل ویسٹ کے پانی سے اگنے والی 2480 کنال سبزیاں ہل چلا کر تلف کر دی گئیں۔ لاہور کے مضافات میں 910کنال پر اگائی گئی سبزیاں تلف کی گئیں۔اس حوالے سے ڈی جی فوڈ اتھارٹی نورالامین مینگل نے تفصیلات سے آگاہ کرتے ہوئے بتایا کہ صوبہ بھر میں میپنگ کر کے تمام علاقوں کو زونز میں تقسیم کر دیا گیا۔ریڈ زونز میں سبزیاں اور دیگر اشیاء خوردونوش اگانے پر مکمل پابندی عائد کر دی گئی ہے۔زہریلے پانی سے سبزیاں اگانے پر فصلیں تلف کرنے کے علاوہ مزید قانونی کاروائی بھی عمل میں لائی جا سکتی ہے۔ان کامزید کہنا تھا کہ ریڈ زون میں شامل علاقوں میں صرف متبادل غیر خوردنی فصلیں اگانے کی اجازت ہے ۔اس حوالے سے ریڈ زون میں شامل علاقوں کے کسانوں کی تربیت کے لیے ورکشاپس کا انعقاد بھی کیا جا رہا ہے ۔کسانوں کو زہریلی سبزیوں کے نقصانات اور متبادل فصلیں اگانے کے بارے میں آگاہی دی جا رہی ہے۔کسانوں کو زہریلے پانی سے اگنے والی
سبزیوں کے نقصانات سے بھی آگاہ کیا جا رہا ہے اور ٹیکسٹائل کیمیکل اور دیگر زہریلے مادوں کے خوراک میں شامل ہو کرخوراک کاحصہ بننے اور انسانوں کے لئے خطر ناک بیماریوں کاسبب کے حوالے سے آگااہی بھی دی جا رہی ہے۔ کاشتکاروں کو ایسے پانی سے صرف پھول، بانس، پٹ سن، ان ڈور پلانٹس یا دیگر غیر خوردنی فصلیں اگا نے کی آگاہی بھی دی جا رہی ہے۔
