دبئی (آئی این پی)نیوزی لینڈ کی بھارت کے ہاتھوں تیسرے اور آخری ٹی20 میچ میں شکست کے ساتھ ہی پاکستان ٹی20 رینکنگ میں دوبارہ عالمی نمبر ایک بن گیا۔بھارت کے خلاف سیریز کے آغاز سے قبل نیوزی لینڈ عالمی درجہ بندی میں پہلے نمبر پر موجود تھا جبکہ سری لنکا کے خلاف سیریز میں فتح کی بدولت پاکستان عالمی نمبر دو

تھا۔بھارت نے نیوزی لینڈ کو پہلے ٹی20 میچ میں شکست دی تو پاکستان عالمی نمبر ایک بن گیا لیکن اگلے ہی میچ میں کیویز نے شاندار انداز میں واپسی کی اور میچ جیت کر سیریز برابر کرنے کے ساتھ ساتھ دوبارہ عالمی نمبر ایک کا منصب حاصل کر لیا۔سیریز کا تیسرا ٹی20 میچ بارش سے متاثر ہوا تو آٹھ اوورز فی اننگز تک محدود کیے گئے میچ میں بھارت نے پہلے کھیلتے ہوئے نیوزی لینڈ کو میچ میں 68 رنز کا ہدف دیا جو بظاہر آسان نظر آ رہا تھا۔تاہم بھارتی بالرز نے اپنی نپی تلی بالنگ سے اس معمولی ہدف کا تعاقب بھی ناکام بنا دیا اور نیوزی لینڈ کی ٹیم مقررہ اوورز میں 61 رنز ہی بنا سکی اور یوں کیویز کو میچ میں چھ رنز کی شکست کے ساتھ ہی سیریز بھی 2-1 سے گنوا بیٹھے۔سیریز میں شکست کے ساتھ ہی نیوزی لینڈ عالمی نمبر ایک کے منصب سے محروم ہو گیا اور پاکستان نے ایک ہفتے میں دوبارہ عالمی نمبر ایک بننے کا اعزاز حاصل کر لیا اور مستقبل قریب میں کوئی ٹی20 میچ نہ ہونے کے سبب پاکستان کی ٹی20 رینکنگ کو کوئی خطرہ لاحق نہیں۔اس وقت عالمی درجہ بندی میں پاکستان 124 پوائنٹس کیساتھ پہلے، نیوزی لینڈ اور ویسٹ انڈیز یکساں 120 پوائنٹس کے ساتھ دوسرے اور تیسرے، انگلینڈ اور بھارت بھی 119 پوائنٹس کے ساتھ بالترتیب چوتھے اور پانچویں نمبر پر موجود ہیں۔عالمی رینکنگ میں جنوبی افریقہ چھٹے، آسٹریلیا ساتویں، سری لنکا آٹھویں، افغانستان نویں اور بنگلہ دیش دسویں نمبر پر موجود ہے۔