ممبئی(این این آئی)بالی وڈ اداکار نوازالدین صدیقی کی متنازع سرگزشت کو تنقید کا نشانہ بنایا جا رہا ہے کیونکہ انھوں نے جن خواتین سے اپنے رشتے کی تفصیلات بیان کی ہیں وہ ان کی اجازت کے بغیر شامل کی گئی ہیں۔’’این آرڈینری لائف‘‘ نامی ان کی سرگزشت 16

اکتوبر کو ریلیز ہوئی تھی جس میں اداکار نے اپنی ساتھی اداکارہ نہاریکا سنگھ کے علاوہ کئی خواتین کے ساتھ اپنے تعلقات کو تفصیل سے بیان کیا تھا۔نہاریکا سنگھ نے ایک بیان میں کہا کہ انھوں نے جو کچھ لکھا اس کے بارے میں مجھے کوئی علم نہیں اور میری مرضی لینے کا تو سوال ہی نہیں ہے۔نوازالدین صدیقی نے سوشل میڈیا پر معافی مانگی ہے۔سوشل میڈیا اکائونٹ پر ان کا کہنا تھا کہ میں ہر اس شخص سے معافی مانگتا ہوں جن کے جذبات ہماری یاد داشت این آرڈینری لائف کی بدنظمی سے مجروح ہوئے ہیں۔ اس کا مجھے افسوس ہے اور اس لیے میں نے اپنی کتاب واپس لینے کا فیصلہ کیا ہے۔انھوں نے کتاب میں مذکور ایک دوسری خاتون کی شکایت کے بعد معافی مانگی جنھیں نوازالدین نے اپنی ’’پہلی گرل فرینڈ‘‘کہا ہے۔ خاتون نے فیس بک پر ’’غیر معمولی جھوٹ‘‘ کا الزام لگایا تھا۔43 سالہ اداکار نے لکھا کہ اس خاتون نے ان سے اس لیے رشتہ توڑ لیا کہ اس وقت جب دونوں ساتھ تھے تو وہ فلموں میں جدوجہد کر رہے تھے۔نوازالدین صدیقی کا بالی وڈ کے گنے چنے باصلاحیت اداکاروں میں شمار ہوتا ہے۔ انھوں نے گینگز آف واسع پور،کک،تلاش،لنچ باکس جیسی کامیاب فلمیں دی ہیں۔