اسلام آباد(مانیٹرنگ ڈیسک)نواز شریف کے شب و روز مسجد نبویؐ میں بسر ہونے لگے، تلاوتِ قرآن پاک کی ویڈیو وائرل۔ تفصیلات کے مطابق سابق وزیراعظم نواز شریف ان دنوں سعودی عرب میں موجود ہیں جہاں ان

کے شب و روز مسجد نبویؐ میں بسر ہو رہے ہیں جہاں وہ نمازوں کے علاوہ نوافل اور تلاوت قرآن میں مصروف رہتے ہیں۔ نواز شریف کی مسجد نبوی میں تلاوت قرآن کرتے ویڈیو انٹرنیٹ پر وائرل ہو گئی ہے جس میں دیکھا جا سکتا ہے کہ سابق وزیراعظم نواز شریف اپنے بیٹے حسین نواز اور پوتے کے ہمراہ مسجد نبوی کے ایک گوشتے میں سکیورٹی حصار میں نہایت انہماک سے قرآن مجید کی تلاوت میں مصروف ہیں جب ان کے ہمراہ ان کے احباب اور سعودی شرطوں کی بڑی تعداد موجود ہے۔ نواز شریف کا ان دنوں زیادہ تر وقت مسجد نبویؐ میں گزر رہا ہے جہاں وہ اپنی اہلیہ بیگم کلثوم نواز کی صحتیابی کیلئے دعائوں اور ذکر و اذکار میں مصروف رہتے ہیں۔ واضح رہے کہ چند دن قبل بیگم کلثوم نواز کی لندن میں اچانک طبیعت بگڑ جانے کے باعث انہیں ہسپتال منتقل کر دیا گیا جہاں انہیں طبی امداد دینے اور طبیعت سنبھل جانے کے بعد واپس گھر بھجوا دیا گیا تھا۔