ممبئی(این این آئی) نامور بالی ووڈ اداکارانیل کپور کے چھوٹے بھائی سنجے کپور نے فلموں میں ناکامی کے باعث ڈراموں میں کام کرنا شروع کردیا۔بھارتی فلم انڈسٹری میں مشہور اداکار، ہدایت کاراور پروڈیوسر کا رشتے دار ہونا کامیابی کی علامت سمجھاجاتا ہے۔ اداکارورون دھون، سونم کپور، عالیہ بھٹ اور سارہ علی خان سمیت متعدد اداکار اپنے مشہور رشتہ داروں کی وجہ سے ہی

بالی ووڈ میں آئے۔ ورون دھون کے والد ڈیوڈ دھون بھارتی فلم انڈسٹری کے نامور ہدایت کار ہیں جب کہ عالیہ بھٹ بھی ہدایت کار مہیش بھٹ کی صاحبزادی ہیں ۔ فلم ’’کیدار ناتھ‘‘ سے فلموں میں انٹری دینے والی اداکارہ سارہ علی خان اداکار سیف علی خان کی بیٹی ہیں۔ لیکن یہاں بہت سے اداکار ایسے بھی ہیں جوبالی ووڈ میں رشتے داریاں ہونے کے باوجود ناکام ہوگئے۔ ان ہی میں سے ایک انیل کپور کے چھوٹے بھائی سنجے کپور ہیں۔اداکار سنجے کپور نے ابتدا میں کئی فلموں میں کام کیا جب کہ مادھوری ڈکشٹ کے ساتھ ان کی فلم ’’راجا‘‘کو بہت پسند کیا گیا یا اگر یہ کہا جائے کہ انہیں فلم ’’راجا‘‘سے شہرت ملی تو غلط نہ ہوگا، اس کے بعد سنجے کپور کئی فلموں میں نظر آئے جن میں ’’محبت‘‘ ، ’’اوزار‘‘ اور ’’صرف تم‘‘ وغیرہ شامل ہیں۔ تاہم سنجے کپور بالی ووڈ میں وہ کامیابی حاصل نہ کرسکے جو ان کے بھائی انیل کپور کے حصے میں آئی۔ فلموں میں کام نہ ملنے کے باعث انہوں نے 14 سال بعد ڈراموں میں کام کرنے کا فیصلہ کیا ہے، ان کا نیا ڈراما’’دل سنبھل جا ذرا‘‘رواں ماہ بھارتی چینل پر نشر ہوگا۔واضح رہے کہ سنجے کپورنیآج سے 14 سال قبل بھی ٹی وی ڈرامے ’’کرشمہ:دی مریکل آف ڈیسٹینی‘‘میں کام کیا تھا، اس ڈرامے میں ان کے ساتھ اداکارہ کرشمہ کپور نے اہم کردارادا کیا تھا۔