ممبئی (این این آئی)ایک طرف جہاں بولی وڈ میں اداکاراؤں کا کیریئر مرد اداکاروں کے مقابلے میں جلد ختم ہوجاتا ہے، وہیں عالیہ بھٹ نے طویل عرصے تک فلمی دنیا سے منسلک رہنے کی خواہش کا اظہار کردیا۔ رپورٹ کے مطابق مامی مووی میلہ کی تقریب میں شریک عالیہ بھٹ سے سوال کیا گیا کہ مادھوری ڈکشٹ اور ان کے دور کی دیگر اداکارائیں اب شاہ رخ خان اور سلمان خان کے

ساتھ کام کرتی نظر کیوں نہیں آتیں؟عالیہ سے یہ سوال بھی کیا گیا کہ بڑی عمر کے اداکار اب تک نئی اداکاراؤں کے ساتھ کام کرتے کیوں نظر آرہے ہیں؟ اور کیا انہیں ڈر لگتا ہے کہ ان کا کیریئر بھی جلد ختم ہوجائے گا؟ان تمام سوالات کا جواب دیتے ہوئے عالیہ بھٹ نے کہا کہ مجھے ایسا محسوس ہوتا ہے کہ اب یہ ٹرینڈ تبدیل ہورہا ہے، اصل میں سب کچھ ہمارے لکھاریوں پر منحصر ہے، اگر وہ ایسی کہانیاں لکھ رہے ہیں جن میں بڑی عمر کی اداکارائیں کام کرسکیں یا وہ شادی شدہ ہوں تو فرق نہیں پڑتا، اداکاری کرنا میرا جنون ہے، اس لیے مجھے کسی قسم کا کردار ادا کرنے میں کوئی مسئلہ نہیں۔عالیہ نے مزید کہاکہ امید ہے میں 90 سال کی عمر تک اداکاری کرسکوں اور اس دنیا سے رخصت بھی کسی فلم کے سیٹ سے ہوں۔واضح رہے کہ عالیہ بھٹ نے بولی وڈ میں اپنے کیریئر کا آغاز 2012 کی ہٹ فلم ’اسٹوڈنٹ آف دی ایئر‘ کے ساتھ کیا تھا، اس فلم میں وہ شنایا نامی کالج کی طلبہ بنی تھیں۔اس کے بعد وہ ’ہمٹی شرما کی دلہنیا‘، ’ہائی وے‘، ’بدری ناتھ کی دلہنیا‘، ’ڈیئر زندگی‘، ’اڑتا پنجاب‘، ’کپور اینڈ سنز‘، ’2 اسٹیٹس‘ جیسی کامیاب فلموں میں جلوہ گر ہوئیں۔