اسلام آباد (مانیٹرنگ ڈیسک) گلوبٹ کو کون قتل کروانا چاہتا ہے اور اس کا فائدہ کسے ہو گا۔ تفصیلات کے مطابق ایک نجی ٹی وی پروگرام میں اظہار خیال کرتے ہوئے گلوبٹ نے انکشاف کیا کہ ان کی جان کو خطرہ ہے۔ گلو بٹ نے کہا کہ انہیں آٹھ ماہ ہوئے جیل سے آئے ہوئے مگر جان کے خطرہ کے پیش نظر وہ آج تک گھر سے باہر نہیں نکلے حتیٰ کہ نماز پڑھنے کیلئے مسجد تک نہیں جاتے۔ انہوں نے کہا کہ شریف خاندان انہیں قتل کروا کر سانحہ ماڈل ٹاؤن کو لیول کرنا چاہتے ہیں۔

انہوں نے کہا کہ میرے قتل سے طاہر القادری کا کیس ختم ہو سکتا ہے۔ انہوں نے کہا کہ انہیں عوامی تحریک یا مسلم لیگ (ن) مروا سکتی ہے اس لئے انہوں نے سپریم کورٹ سے استدعا کی ہے کہ انہیں سکیورٹی مہیا کی جائے۔ واضح رہے کہ گلوبٹ پہلی دفعہ 17 جون 2014 کو سانحہ ماڈل ٹاؤن کے دوران سامنے آبا۔ بعض رپورٹ کے مطابق گلوبٹ کا تعلق حکومتی جماعت مسلم لیگ (ن) سے ہے مگر خواجہ سعد رفیق کا دعویٰ ہے کہ اس کا حکومتی جماعت سے کوئی تعلق نہیں۔