انقرہ /لاہور(آئی این پی ) وزیراعلیٰ پنجاب شہبازشریف نے کہا ہے کہ ورلڈ الیون اور پاکستان کے کھلاڑیوں نے قوم کو عمدہ کھیل سے بھرپور محظوظ کیا،ہار اورجیت سے قطع نظر پرامن پاکستانی قوم کو فتح ملی ہے،میچوں کا پرامن انعقاد پرامن پاکستان کی جیت اور امن دشمنوں کی شکست ہے۔ہفتہ کو
ایک بیان میں وزیراعلی شہبازشریف نے کہا کہ پنجاب حکومت نے عوام کی سہولت اور شائقین کرکٹ کیلئے شاندار انتظامات کئے، ورلڈ الیون کے میچوں کے دوران سیکیورٹی کے بھی فول پروف انتظامات کئے گئے، ان میچوں کا پرامن انعقاد پرامن پاکستان کی جیت اور امن دشمنوں کی شکست ہے۔خادم اعلی پنجاب نے کہا کہ بہترین کھیل پیش کرنے پر دونوں ٹیموں کے کھلاڑیوں کو مبارکباد دیتے ہیں، پنجاب حکومت کی جانب سے آزادی کپ کے میچوں کے دوران سکیورٹی و دیگر انتظامات انتہائی شاندار رہے ، سیریز میں شائقین کرکٹ کو پرسکون اور بہترین ماحول میں کرکٹ کے کھیل سے لطف اندوز
ہونے کے مواقع فراہم کئے گئے ہیں۔
