اسلام آباد(آئی این پی )الیکشن کمیشن نے چیئرمین تحریک انصاف کے گرفتاری وارنٹ پولیس حکام کو ارسال کردیئے،چیرمین پی ٹی آئی کو 25 ستمبر کو گرفتار کرکے پیش کیا جائے۔الیکشن کمیشن نے عمران خان کے خلاف توہین عدالت کیس کا تحریری فیصلہ جاری کردیا ہے

جس میں کہا گیا ہے کہ عمران خان ملک میں موجود ہونے کے باوجود پیش نہیں ہوئے۔ اس نے الیکشن کمیشن کا ہر فیصلہ نظر انداز کیا۔ فیصلے میں عمران خان کے قابل ضمانت وارنٹ گرفتاری جاری کرنے کا حکم دیا اور ساتھ ہی ایک لاکھ کے مچلکے جمع کرانے کا حکم دیا۔ تفصیلی فیصلے میں کہا گیا کہ عمران خان دو شخصوں کی ضمانتیں بھی پیش کریں ،عمران خان عوامی نمائندگی ایکٹ 1976 کی دفعہ 103 کے تحت توہین عدالت کے مرتکب ہوئے۔الیکشن کمیشن نے عمران خان کے وارنٹ گرفتاری ایس ایس پی آپریشنز کو ارسال کردیئے ہیں جس میں کہا گیا ہے کہ چیرمین پی ٹی آئی کو 25 ستمبر کو گرفتار کرکے پیش کیا جائے۔الیکشن کمیشن کی جانب سے عمران خان کو ایک لاکھ روپے کے مچلکے اور 2 افراد کی ضمانت دینے کے احکامات بھی دیئے گئے ہیں۔الیکشن کمیشن کی جانب سے حکم نامے کی کاپی عمران خان نیازی کے بنی گالہ اور پی ٹی آئی سینٹرل سیکریٹریٹ پر ارسال کی گئی ہے۔‎