لاہور( آن لائن)عمر اکمل نے پی سی بی کی جانب سے بھجوائے گئے شوکاز نوٹس کے جواب میں مکی آرتھر کے خلاف پریس کانفرنس کو ’’ہیٹ آف دی مومنٹ‘‘قرار دے دیا۔عمر اکمل نے اس سے قبل بھی پی سی بی کا اپنا جواب جمع کروایا تھا جسے انہوں نے مسترد کر تے ہوئے دوبارہ اپنا جواب داخل کروانے کے لیے کہا تھا۔میڈیا رپورٹس کے مطابق عمر اکمل نے اپنا جواب تیار کرلیا ہے جس میں ہیڈ کوچ مکی آرتھرپر لگائے گئے تمام الزامات کو ہیٹ آف دی مومنٹ قرار دے دیا،جواب میں
یہ بھی لکھا گیاہے کہ غیرارادی طور پر کوڈ آف کنڈکٹ کی خلاف ورزی ہوئی،پی سی بی کی کو ڈ کی 3شقوں کی خلاف ورزی سے ناواقف تھا۔اس سے قبل پی سی بی نے معاملے کی تحقیقا ت کے لئے تین رکنی کمیٹی بنائی تھی۔دریں اثناء فاسٹ باؤلر محمد عامر کی ورلڈ الیون کے خلاف پہلے ٹی ٹونٹی میچ میں عدم شرکت کا امکان ہے، ذرائع نے بتایا کہ فاسٹ باؤلر محمد عامر ان دنوں انگلینڈ میں موجود ہیں انہوں نے پی سی بی کو بھی اپنی مصروفیات سے آگاہ کیا جس کے باعث عامر خان کی پہلے ٹی ٹونٹی میچ میں شرکت مشکوک دکھائی دے رہی ہے ،ذرائع نے بتایا کہ محمد عامر آج (پیر) کے روز پاکستان پہنچ گئے تو وہ پہلے ٹی ٹونٹی میچ میں شرکت کر سکیں گے تاہم ابھی تک اطلاعات ہیں کہ وہ (منگل ) کی شام تک پاکستان پہنچ جائیں گے جس کے بعد وہ دوسرے ٹی ٹونٹی میچ کے لئے دستیاب ہوں گے۔
