لاہور ( این این آئی)لاہور ہائیکورٹ نے امیر جماعۃ الدعوۃ پروفیسر حافظ محمد سعید و دیگر رہنماؤں کی نظربندی سے متعلق دائر کیس سنگل جج کے روبر و سماعت کیلئے چیف جسٹس کے پاس بھجوا دیا ۔گزشتہ روز جسٹس عبدالسمیع خاں کی سربراہی میں ڈویژنل بنچ نے کیس کی سماعت شروع کی تو فاضل جسٹس نے قرار دیا کہ آئین اور قانون کی روشنی میں 16ایم پی او کے تحت بنایا گیا مقدمہ سنگل جج ہی سن سکتا ہے

جس پر درخواست چیف جسٹس کے پاس بھجوائی جارہی ہے۔کیس کی آئندہ سماعت کل ( جمعرات ) 7ستمبر کو ہو گی۔ حافظ محمد سعید کیس کی سماعت کے دوران جماعۃالدعوۃ سیاسی امور کے سربراہ پروفیسر حافظ عبدالرحمن مکی سمیت جماعۃالدعوۃ کے کارکنان و ذمہ داران، وکلاء اور دیگر شعبہ ہائے زندگی سے تعلق رکھنے والے افراد کی کثیر تعداد موجود تھی۔