سان فرانسسکو(نیوزڈ یسک )اب آپ کے گھر میں کوئی اشیا ختم ہوجائے تو پریشان ہونے کی کوئی بات نہیں کیونکہ اب آپ ایک بٹن دبا کر اپنی ضرروت کی اشیا گھر بیٹھے حاصل کرسکتے ہیں۔ایمیزون کی جانب سے ”ڈیش“ نامی ایسا سسٹم تیار کیا گیا ہے جو چھوٹے بٹن کی صورت میں ہے یہ بٹن بالکل کار لاک کرنے والے وائرلیس بٹن کی طرح کام کرتا ہے جو چابی کے ساتھ جڑا ہوتا ہے۔ اس جدید سسٹم کی خاص بات یہ ہے کہ اسے کسی بھی سطح پر چپکایا جاسکتا ہے جیسے واشنگ پاو¿ڈر آرڈر کرنے والا بٹن واشنگ مشین پر چپکایا جاسکتا ہے یا پیزا آرڈر کرنے والا ڈیش بٹن کھانے کی میز پر چسپاں کیا جاسکتا ہے جب کہ بٹن دبانے پر وہ سفید ہوتا ہے اور پھر سبز جس کا مطلب ہے کہ ایمیزون تک آرڈر پہنچ گیا ہے تاہم اگر بٹن غلطی سے ایک سے زائد مرتبہ دب جائے تو ایمیزون آپ کے اسمارٹ فون پرآرڈر پورا نہ ہونے کی اطلاع فراہم کرے گا۔ایمیزون ڈیش سے باو¿نٹ، اولے، جیلٹ، ٹائیڈ، اسمارٹ واٹر، اِیزی جوس جیسے کئی برانڈز کا آرڈر دیا جاسکتا ہے، اس میں نصب بیٹری کئی سال تک چلتی ہے اور بیٹری ختم یا بٹن خراب ہونے پر نیا بٹن مل جاتا ہے، گھریلو وائی فائی سے جڑا یہ چھوٹا سا آلہ آپ کے موبائل پرایمیزون ایپس سے منسلک ہوتا ہے جس پر آرڈر کی کنفیگریشن پہلے سے ہی ہوتی ہے لیکن اس کی سیٹنگ کےبعد ضروری نہیں کہ فون کھلا رکھا جائے بلکہ وہ براہِ راست ایمیزون سے وابستہ ہوجاتا ہے۔یہ جدید بٹن ایمیزون کے پرائم ممبرز کو مفت میں دیا جائے گا جس کے ذریعے فی الحال وہ 17 برانڈزکی اشیا منگواسکتے ہیں اس طرح آپ مزید بٹن بھی حاصل کرسکتے ہیں جسے ماہرین ضروریات پوری کرنے والی چھڑی قرار دے رہے ہیں۔ آرڈر کےوقت کا انحصار ایمیزون اکاو¿نٹ پر آپ کی ہسٹری اور اس کی ضرورت پر ہوتا ہے۔اس سے قبل ایمیزون فریش نامی سہولیات بھی متعارف کرائی گئی ہیں جس کے ذریعے ایک بٹن دباتے ہی سبزیاں، پھل اور گھریلو سودا بھی منگوایا جاسکتا ہے۔