اسلام آباد (مانیٹرنگ ڈیسک) چین کے بعد روس نے بھی پاکستان کے ساتھ بڑے معاہدے پر دستخط کر دیے، تفصیلات ضلع کوہاٹ میں او جی سی ایل خیبرپختونخوا نے آئل ریفائنری قائم کرنے کے لیے روسی کمپنیوں کے ساتھ ایک معاہدے پر دستخط کیے ہیں۔ معاہدے کی رُو سے روسی کمپنیاں ضلع کوہاٹ میں درمیانے درجے کی آئل ریفائنری قائم کرنے کے لیے سرمایہ کاری کریں گی۔
دو روسی کمپنیوں انٹرراد انجینئرنگ اور حماش اپارٹ پر مشتمل کنسورشیم کے وفد نے اس سلسلے میں گزشتہ روز او جی سی ایل کے چیف ایگزیکٹو رضی الدین سے ملاقات کی، اس ملاقات کے دوران وفد کو خیبر پختونخوا میں آئل اینڈ گیس کے منصوبے کے متعلق تفصیلی بریفنگ دی گئی۔ اوجی سی ایل کے چیف ایگزیکٹو رضی الدین نے روسی وفد کا خیرمقدم کرتے ہوئے کہا کہ خیبرپختونخوا حکومت نے صوبے میں سرمایہ کاری کرنے والی غیرملکی کمپنیوں کو پرکشش مراعات پرمشتمل پیکج کا اعلان کیا ہے جو دنیا کے کسی بھی ترقی یافتہ ملک کی طرف سے دیے جانے والے پیکج سے کم نہیں، اس کی وجہ سے غیر ملکی سرمایہ کاروں کے لیے خیبرپختونخوا خصوصی اہمیت اختیارکرگیا ہے، ہمارے صوبے میں تیل و گیس کے وسیع ذخائر موجود ہیں۔ دوسری طرف روسی وفد نے خیبرپختونخوا حکومت کی جانب سے کوہاٹ میں آئل ریفائنری کے قیام میں بھرپور تعاون کرنے پر شکریہ ادا کیا اور کہا کہ توانائی کے اس منصوبے سے دونوں ملکوں کوایک دوسرے کے تجربات سے استفادہ کرنے اور دو طرفہ تعاون کے فروغ میں مدد ملے گی۔
