واشنگٹن(این این آئی) رواں برس کے 4 ماہ کے دوران ساڑھے 6 ہزار سے زائد افغان سیکیورٹی فورسز اہلکار ہلاک یا زخمی ہوئے ہیں۔امریکا کی سرکاری رپورٹ کے مطابق رواں برس طالبان کی افغان سیکیورٹی فورسز پر حملوں میں تیزی آئی جاری کردہ رپورٹ کے مطابق افغان طالبان کے حملوں میں رواں برس کے ابتدائی 4 ماہ میں 2 ہزار 531 افغان سیکیورٹی اہلکار جان کی بازی ہار گئے۔

رپورٹ کے اعداد و شمار کے مطابق حملوں میں 4 ہزار 238 اہلکار زخمی ہوئے ہیں، اس طرح ہلاک اور زخمی ہونے والے افغان سیکیورٹی فورسز کے اہلکاروں کی تعداد 6 ہزار 769 رہی ۔رپورٹ کے مطابق مجموعی طور پر گزشتہ برس کے مقابلے میں رواں برس افغان طالبان کے حملوں کی تعداد اور شدت میں اضافہ دیکھنے میں آیا۔