اسلام آباد(مانیٹرنگ ڈیسک)فرانس کا یوم آزادی، فرانسیسی سفارتخانے میں تقریب کا انعقاد، جے آئی ٹی رپورٹ کے بعد نواز حکومت کا مستقبل موضوع بحث بنا رہا، غیر ملکی سفرا اور دیگر سفارتکار نوازحکومت بارے بے یقینی کی صورتحال سے متاثر نظر آتے ہوئے سوالات کرتے رہے۔ تفصیلات کے مطابق فرانس کے یوم آزادی کے موقع پر اسلام آباد میں واقع فرانسیسی سفارتخانے
میں ایک پروقار تقریب کا انعقاد کیا گیا ہے جس میں غیر ملکی سفیروں اور سفارتکاروں کی کثیر تعداد نے شرکت کی ۔ اس موقع پر پاکستانی سیاستدانوں کو بھی مدعو کیا گیا تھا جن میں چوہدری شجاعت حسین ، مشاہد حسین سید، وفاقی وزیر خرم دستگیر بھی شامل تھے۔ اس موقع پر غیر ملکی سفیر اور سفارتکار وں کی طرف سے ایک ہی سوال پوچھا جاتا رہا کہ اب پاکستان میں کیا ہونے جا رہا ہے اور آیا وزیراعظم نواز حکومت کی حکومت بچ جائے گی یا انہیں جانا پڑے گا اور اگر وہ مستعفی ہوتے ہیں تو ان کا جانشین کون ہو گا۔ پاکستان کے ایک موقر قومی روزنامے کے مطابق تقریب میں بھارتی ہائی کمشنر کا کہنا تھا کہ پاکستان میں وزیراعظم یا حکومت کی تبدیلی پاکستان کا اندرونی معاملہ ہے جس سے بھارت کو کوئی فرق نہیں پڑتا۔ ایک یورپی سفیر نے اس موقع پر نام ظاہر نہ کرنے کی شرط پر بتایا کہ یورپی ممالک نواز حکومت اور جمہوریت کے حامی ہیں اورخواہش رکھتے ہیں کہ پاکستانی معیشت میں ہونیوالی ترقی جاری رہے۔تقریب کے میزبان فرانسیسی سفیر نے اس موقع پر پاکستان کی ترقی کی تعریف کرتے ہوئے دنیا کو پاکستان میں مواقعوں سے فائدہ اٹھانے کی دعوت دی ۔ تقریب کے مہمان خصوصی خرم دستگیر نے فرانس اور پاکستان کے تعلقات مضبوط بنانے پر فرانسیسی سفیر کی کوششوں کی تعریف کی۔
