لاہور ( این این آئی) لاہور ہائی کورٹ نے پاناما پیپرز میں نامزد پاکستانی شخصیات کے نام ایگزٹ کنٹرول لسٹ میں شامل کرنے کے لیے دائر درخواست کے قابل سماعت ہونے یا نہ ہونے سے متعلق فیصلہ محفوظ کرلیا۔ لاہور ہائی کورٹ کے مسٹر جسٹس شمس محمود مرزا نے فاروق امجد کی درخواست پر سماعت کی۔
درخواست گزار فاروق امجد نے عدالت کو بتایا کہ پاناما پیپرز میں نامزد پاکستانی شخصیات کی منی لانڈرنگ کی وجہ سے پوری دنیا میں ملک کی بدنامی ہوئی اور پاناما پیپرز میں جن افراد کے نام سامنے آئے ہیں ان کے حوالے سے معاملات اعلی عدلیہ میں زیر التوا ہے۔انہوں نے عدالت سے استدعا کی کہ پاناما پیپرز کا سامنا کرنے والے کرپٹ افراد کے نام ایگزٹ کنٹرول لسٹ میں شامل کرنے کا حکم دیا جائے۔جس پر عدالت نے درخواست کے قابل سماعت ہونے یا نہ ہونے سے متعلق فیصلہ محفوظ کر لیا۔
