اسلام آباد(این این آئی)اردوکی 30 ہزارکتب پر مشتمل پاکستان کاپہلا انٹرنیٹ سے غیرمنسلک کتب خانہ تیار کر لیا گیاہے،کتب خانہ کا سائز 10ٹیرا بائٹ ہے ،جسے بہت جلد تعلیمی اداروں اورکتب خانوںکوملک بھر میں متعارف کرایا جائے گا،ان خیالات کا اظہار سوفٹ ویئر پروگرامر سعید رضا نے صحافیوں کے اعزاز میں دئیے گئے عشائیہ میں کیا ۔
انہوں نے کہا کہ وہ ملک میںاردو زبان کی بہتری اورترقی کے لیے انتھک محنت کررہے ہیں، کتب خانہ کی تیاری کے ساتھ ساتھ وہ اردو کی ایک ایسی لغت بھی تیار کرنے کاارادہ رکھتے ہیں جس میں تمام زبانوں کے الفاظ کی آوازسننے کی سہولت بھی موجود ہواوراردوکے تمام الفاظ سو فیصد اعراب کے ساتھ ہوںاور لغت ملک میں موجودتمام79 زبانوں کا احاطہ بھی کرسکے ایسی جدید لغت تیار ہونے سے اردو کے بہت سے پیچیدہ مسائل حل ہوسکیں گے جن میں سب سے اہم مسائل الفاظ کی تلاش ،ایک زبان سے دوسری زبان میں تبدیلی،اورلکھتے ہوئے الفاظ کی درستگی کو جانچنا ہے،موجودہ اردو میں 58 الفاظ اور15 اعراب شامل ہیںچند الفاظ کو دو بھی شمار کیا جاتا ہے جیسا کہ جڑا ہوا ہمزااورعلیحدہ ہمزہ۔ انہوں نے کہا کہ میں نے عرصہ دوسال میں اس سوفٹ وئیر کو مکمل کیاہیجوکہ 30ہزار کتب اور 53لاکھ صفحات پر مشتمل پاکستان کا پہلا انٹرنیٹ سے غیر منسلک کتب خانہ ہے ،جسے انٹرنیٹ سے منسلک بھی کیا جاسکتا ہے ،انٹرنیٹ سے غیر منسلک رکھنے کی وجہ یہ ہے کہ پاکستان میں انٹرنیٹ بہت سے علاقوں میںموجود ہی نہیں اور جہا ںہے وہاں بھی کافی مسائل کا شکار ہے،انہوں نے کہاکہ حکومت اس شعبہ میں خصوصی توجہ دے اورپاکستان میں موجود تمام کتابوں کو ڈیجیٹل کر کے آن لائن فراہم کرے تاکہطلبا اردو کیساتھ ساتھ دوسری زبانوں پربھی عبور حاصل کر سکیں۔
