سرگودھا (مانیٹرنگ ڈیسک ) جنوبی پنجاب سے تعلق رکھنے والے جمشید دستی کو ضمانت کے بعد جیل سے رہا کر دیا گیا ہے ۔ میڈیا رپورٹس کے مطابق جیل سے رہائی کے وقت ان کے مداحوں اور کارکنوں کی بڑی تعداد موجود تھی جنہوںنے اپنے لیڈر کی رہائی پر خوب جشن منایا اور مٹھائیاں تقسیم کیں ۔

رہائی کے بعد گفتگو کرتے ہوئے جمشید دستی نے بتایا کہ جب میں 6دن سے بھوکا تھا تب سرگودھا کے سیشن جج صاحب جیل میں آئےاور انہوںنے مجھے جیل میں بی کلاس دلواتے ہوئے میرے کھانے پینے کا انتظام کیا ۔ عدالت کی جانب سے 6 مقدمات میں ضمانت ہونے کے بعد رکن قومی اسمبلی جمشید دستی کا کہناتھا کہ جج صاحبان نے مجھ سے کہا یہ پاکستان کی پنجاب کی آزاد عدلیہ ہے وہ کسی سیاسی حکومت کی آلہ کار نہیں ہے ۔انہوں نے کہا کہ میں ڈیرہ غازی خان کی عدلیہ اور مظفرگڑھ کی عدلیہ کو بھی سلام پیش کرتاہے جنہوں نے میرے ساتھ انصاف کیا اور میری ضمانت ہوئی ۔آج مجھے خوشی ہے اور فخر سے کہتاہوں کہ پاکستان کی عدلیہ آزاد ہے ،آج وقت کا وزیراعظم اور اس کے بیٹے ملک کی تاریخ میں پہلی دفعہ وہ پیشیاں بھگت رہے ہیں اور انصاف ہونے جارہاہے ۔