لاہور (مانیٹرنگ ڈیسک) پہلی چیمپئنز ٹرافی کی فاتح ٹیم جنوبی افریقا کے کپتان ہنسی کرونئے اب اس دنیا میں نہیں ہیں، وہ ایک طیارہ حادثہ میں ہلاک ہو گئے تھے۔ آسٹریلین ٹیم کے کپتان مارک واہ تھے جو آج کل پراپرٹی کے کاروبار سے وابستہ ہیں۔ وہ کرکٹ سے ریٹائرمنٹ کے بعد رگبی کلب سے بھی منسلک رہے۔ انگلینڈ کے اس وقت کے کپتان ایڈم ہولیوک تھے جو آج کل آسٹریلیا میں مقیم ہیں اور پراپرٹی کے کاروبار سے وابستہ ہیں۔انڈین ٹیم کے کپتان اظہر الدین تھے،
وہ آج کل کانگرس کی طرف سے سیاست میں وارد ہیں اور اتر پردیش کے ضلع مراد آباد سے ممبر پارلیمنٹ ہیں۔ نیوزی لینڈ کے اس وقت کے کپتان سٹیفن فلیمنگ آج کل کرکٹ سے متعلقہ کمپنی چلا رہے ہیں اور انہوں نے سابق کپتان برینڈن میکلم کو بھی اپنے ساتھ کمپنی میں شامل کر لیا ہے۔پہلی چیمپئنز ٹرافی میں پاکستان ٹیم کے کپتان عامر سہیل تھے۔ بائیں ہاتھ سے کھیلنے والے اوپنر بیٹسمین آج کل ٹی وی چینلز پر کرکٹ تجزیہ کار کے طور پر نظر آتے ہیں۔ سری لنکن کپتان ارجنا رانا ٹنگا تھے، وہ بھی آج کل سیاست میں ہیں اور صدارتی الیکشن میں سریسینا کو سپورٹ کرنے کے بعد سری لنکن کیبنٹ کے وزیر ہائی وے اور پورٹ اینڈ شپنگ ہیں۔ ویسٹ انڈیز کے کپتان برائن لارا آج کل نیوکیسل سے وابستہ ہیں اور کرکٹ کی کچھ مصروفیات رکھتے ہیں۔ زمبابوے کے ایلسٹر کیمبل ریٹائرمنٹ کے بعد چیئرمین کرکٹ کمیٹی رہے، پھر چیف سلیکٹر زمبابوے کرکٹ ٹیم بن گئے۔
