دبئی (مانیٹرنگ ڈیسک) اسامہ بن لادن کے بیٹے نے امریکہ سے اپنے والد کے قتل کا بدلہ لینے کی دھمکی دیدی ہے۔ انٹیلی جنس گروپ ویب سائٹ کے مطابق انٹرنیٹ پر آن لائن جاری کئے گئے ایک آڈیو بیان میں حمزہ بن لادن نے امریکہ اور اس کے اتحادیوں کے خلاف دہشتھگرد حملے اورمسلح جنگ جاری رکھنے کا عہد کیا۔ اسامہ کے بیٹے کی 21 منٹ کی اس تقریر کو ”ہم سب اسامہ ہیں“ کا عنوان دیا گیا ہے۔
حمزہ بن لادن کا کہنا ہے کہ فلسطین، افغانستان، شام، عراق، یمن اور صومالیہ کے عوام پر مظالم کے جواب میں امریکہ اور اس کے اتحادی ممالک کے اندر اور باہر حملے جاری رہیں گے۔ حمزہ کا کہنا تھا کہ امریکہ اور اس کے اتحادی ممالک سے صرف اسامہ بن لادن کے قتل کا بدلہ نہیں بلکہ یہ انتقام اسلام کی مخالفت کرنے پر انتقام لیا جائے گا۔ امریکی تھنک ٹینک بروکنگ انسٹی ٹیوٹ کے مطابق امریکی حکومت کی طرف سے جاری کردہ اسامہ بن لادن کے کمپاؤنڈ سے ملنے والی دستاویزات میں بتایا گیا تھا کہ اسامہ بن لادن کے حامی 25 سے تیس سال حمزہ بن لادن کی قیادت میں اکٹھے ہو سکتے ہیں جو اسامہ کے مارے جانے کے وقت ایران میں نظربند تھے۔ بروکنگ انسٹی ٹیوٹ کے تجزیہ کار بروس روڈل کے مطابق گزشتہ سال القاعدہ لیڈر ایمن الظواہری کی طرف سے جاری کئے گئے آڈیو پیغام میں بھی حمزہ بن لادن کی آواز سنی گئی تھی۔ بروس رڈل کا کہنا تھا کہ القاعدہ کو حمزہ بن لادن کی شکل میں نیا چہرہ مل گیا ہے جو القاعدہ کے بانی اسامہ بن لادن کا بیٹا اور امریکہ اور اس کے اتحادیوں کیلئے ایک واضح اور خطرناک دشمن ہے۔
