ایڈیلیڈ (نیوز ڈیسک) ورلڈکپ 2015ءکے کوارٹر فائنل میں آسٹریلیا کے ہاتھوں پاکستان کی شکست پر شائقین کرکٹ کیساتھ ساتھ سابق کرکٹرز بھی سیخ پا ہیں اور مختلف طریقوں سے اپنے دل کی بھڑاس نکالنے میں مصروف ہیں۔ سابق کرکٹرز ٹورنامنٹ اور میچ میں ناقص کارکردگی کا مظاہرہ کرنے والے کھلاڑیوں کو خصوصی طور پر نشانہ بنا رہے ہیں اور اس طرح کا ایک دلچسپ اور پرمزاح پیغام رمیز راجہ نے بھی شاہد آفریدی کے نام دیا ہے۔  آسٹریلیا سے شکست کے بعد سابق کرکٹر اور کمنٹیٹر رمیز راجہ نے مائیکرو بلاگنگ ویب سائٹ ”ٹوئٹر“ پر جاری ایک پیغام میں شاہد آفریدی کو طنز کا نشانہ بنایا اور کہا کہ ” کوئی بات نہیں شاہد بھائی، ورلڈکپ ہار گئے تو کیا ہوا، آپ کے بال ابھی بھی بہت خوبصورت ہیں“۔  واضح رہے کہ شاہد خان آفریدی کا ون ڈے کیرئیر کا اختتام انتہائی مایوس کن رہا ہے اور میگاایونٹ میں وہ بری طرح ناکام رہے ہیں جبکہ وہ پاکستان کے ٹی وی چینلز پر چلنے والے مختلف اشتہارات میں مسلسل ایکٹنگ کر رہے ہیں جن میں سے ایک اشتہار مشہور شیمپو کا بھی ہے۔ اسی اشتہار کو مدنظر رکھتے ہوئے رمیز راجہ نے شکست کا غم غلط کرنے کیلئے شاہد آفریدی کے بالوں کا ذکر کرنا ضروری سمجھا اور ڈھکے چھپے الفاظ میں دل کی بات کہہ ڈالی۔