کابل(آئی این پی)افغان صدر ڈاکٹر اشرف غنی نے کہا ہے کہ تشدد ،طاقت اور بربریت کے ذریعے اقتدار حاصل کرنے کا دور گزر چکا جو لوگ تشدد کے ذریعے اقتدار حاصل کرنے کا سوچ رہے ہیں وہ نہ تو اسلام سے واقف ہیں اور نہ ان کا تعلق افغانستان سے ہے ،افغان فورسز دہشتگردوں اور ظلم کے خلا ف جہاد کررہی ہیں۔
افغان خبررساں ادارے ’’خاما پریس‘‘ کے مطابق افغانستان میں سوویت افواج کی شکست کے موقع پر ایک اجتماع سے خطاب کرتے ہوئے اشرف غنی نے افغان نیشنل ڈیفنس اور سیکورٹی فورسز کی دہشتگرد گروپوں کے خلاف حالیہ مہم کی تعریف کی اور کہاکہ افغان فورسز اب بھی غلط اور ظلم کے خلاف جہاد کررہی ہیں۔انھوں نے کہاکہ ماضی میں افغان قوم نے غلط کے خلاف جہاد کیا تھا اسی طرح افغان فورسز دہشتگردگروپوں کے خلاف لڑ رہی ہیں اور غلط کے خلاف جہاد کررہی ہیں۔اسلامی دنیا اور دوسری قومیں افغان فورسز کی اسی طرح بہادری اور لڑائی کی حمایت کرتی ہیں جس طرح انھوں نے ماضی میں سوویت افواج کے خلاف افغان قوم کی حمایت کی تھی ۔افغان قوم کواب بھی ظالموں کا سامنا ہے اور وہ چھپے ہوئے اور واضح دونوں طرح کے دشمنوں کا سامنا کررہے ہیں اور اپنی جانیں قربان کررہے ہیں۔شاہین فوجی کور پر حملے میں 141 فوجیوں کی شہادت دہشت گردی کے خلاف جنگ میں افغان قوم کے دعووں کو ثابت کرتا ہے ۔افغان صدر نے مزید کہاکہ تشدد ،طاقت اور بربریت کے ذریعے اقتدار حاصل کرنے کا دور گزر چکا ہے جو لوگ تشدد کے ذریعے اقتدار حاصل کرنے کا سوچ رہے ہیں وہ نہ تو اسلام سے واقف ہیں اور نہ ان کا تعلق افغانستان سے ہے ۔