اسلام آباد (مانیٹرنگ ڈیسک) سابق بھارتی کپتان مہندر سنگھ دھونی ایک کامیاب کرکٹر بننے سے پہلے عام انسان کی طرح زندگی گزار رہے تھے، راتوں رات ان پر قسمت کی دیوی مہربان ہوگئی، اور وہ دنیا کی مقبول شخصیت بن گئے، اس کے علاوہ دھونی کی شخصیت کا نمایاں پہلو عجزوانکساری بھی ہے، وہ اپنے کھیل میں کمال درجہ مہارت کے ساتھ ایک نرم دل، احساسات اور

دوستی کے جذبات سے لبریز انسان ہیں۔ دھونی ایک عظیم کرکٹر ہیں، اس بات کو تو سب ہی جانتے ہیں، لیکن ان کی زندگی ایک عام آدمی سے مختلف نہیں ہے۔ ان کی ہمہ جہت شخصیت کا ایک پہلو یہ بھی ہے کہ وہ اپنے پرانے دوستوں کے ساتھ ابھی تک رابطے میں رہتے ہیں، ان کے مطابق دوستی کے رشتے میں دنیاوی مقام و مرتبہ رخنہ نہیں ڈال سکتے۔اس کی زبردست مثال اس وقت دیکھنے میں آئی جب کلکتہ کے ایڈن گارڈن سٹیڈیم میں جاری وجے ہزارے ٹرافی کے دوران دھونی نے اپنے پرانے دوست ٹھامس سے ملاقات کی۔ دھونی کی زندہ دلیِ اس وقت دیکھنے میں آئی جب وہ ڈریسنگ روم سے باہر آئے تو اپنے دوست ٹھامس کو انتظار کرتا پایا، جو ایک چائے والا ہے، اور اس کا کھارگ پور ریلوے سٹیشن پر چائے کا ڈھابہ ہے، دھونی جس دور میں انڈین ریلوے میں ٹی ٹی ای تھے تو روزانہ وہ مرتبہ اس ڈھابے سے چائے پینا ان کا معمول تھا۔ دھونی نے جب اپنے دوست کو دیکھا تو فورا پہچان لیا اور اسے گلے سے لگا لیا۔ اس کے بعد دھونی نے اپنے دوست کے ساتھ

ڈنر بھی کیا۔ دھونی کی اپنے دوست کے ساتھ ملاقات 13 سال بعد ہوئی۔ یہ واقعہ ثابت کرتا ہے کہ دھونی بامِ عروج پر بھی عاجزی اور انکساری کا مظاہرہ کرتے ہیں۔ وہ اپنی مثبت سوچ کی وجہ سے مقبول ہیں، اور اپنی مصروفیات کے باوجود اپنے دوستوں کو دستیاب رہتے ہیں۔ آپ کامیاب ہو سکتے ہیں لیکن لوگوں کے دلوں میں گھر کرنے کیلئے آپ کو ان کے معیار پر پورا اترنا پڑتا ہے۔