بہاولنگر(مانیٹرنگ ڈیسک) ذرا نم ہو تو یہ مٹی بڑی زرخیز ہے ساقی کے مصداق پاکستانی طالبعلموں نے ایک شاندار سائنسی کارنامہ سر انجام دیدیا۔ تفصیلات کے مطابق دانش سکول چشتیاں کے تین طالبعلموں احمد احسن، نعیم احسن اور لیاقت علی نے ایسی موبائل فون بیٹری ایجاد کر لی ہے جو بجلی سے چارج نہیں ہوگی بلکہ انسانی آواز سے چارج ہوگی۔
تینوں طالبعلموں کی ایجاد کردہ یہ بیٹری کال پر بات کرتے ہوئے ساتھ ساتھ چارج ہوتی جائے گی۔ متذکرہ طلباء نے فزکس کے استاد حق نواز کی نگرانی میں پراجیکٹ تیار کیا ہے ۔ جس کے ذریعے موبائل فون صارفین جتنی بات کریں گے انکے موبائل کی بیٹری چارج ہوتی رہے گی۔ چشتیاں سے تعلق رکھنے والے ان تینوں طلباء کے سائنسی پراجیکٹ کو بین الاقوامی کمپنی انٹل سائنس کے زیر اہتمام کامسیٹس یونیورسٹی لاہور میں قومی سطح پر منعقد ہونے والے سائنسی پراجیکٹ کے مقابلوں میں پیش کیا گیا ہےجہاں اس ایجاد دنیا بھر کے سائنسی ماہرین کو ورطہ حیرت میں ڈال دیا ہے۔اس مقابلے میں عالمی سائنسی ماہرین نے تینوں طلباء کا پراجیکٹ کامیاب قرار دے کر تیرہ سے بیس مئی کو امریکہ کے شہر لاس اینجلس میں بین الاقوامی سطح پر منعقد ہو نے والے انٹل سائنسی پراجیکٹ مقابلہ کے لیے سیلکٹ کر لیا ہے ۔ چنانچہ طلباء نے اپنے استاد کی قیادت میں گیارہ مئی کو امریکہ روانہ ہوں گئے۔دانش سکول کے پرنسپل محمد یٰسین مرزا نے مزید بتایا کہ تینوں طلباء کا تیار کردہ پراجیکٹ قابل ستائش ہے ۔ان کا کہنا تھا کہ مذکورہ پراجیکٹ کی کمرشل بنیادوں پر کامیابی سے کروڑوں لوگ استفادہ کر سکیں گے۔
