لاہور(مانیٹرنگ ڈیسک) نجی ٹی وی چینل دنیا نیوز کی رپورٹ کے مطابق پاکستانی ٹیم کے سابق کپتان شاہد آفریدی نےگفتگو کرتے ہوئے کہا ہے کہ عمران خان ان کی فٹنس سے متاثر ہوئے ہیں۔ تفصیلات کے مطابق شاہد آفریدی نے کراچی یونیورسٹی میں ایک تقریب کے دوران گفتگو میں کہا کہ عمران خان سمجھتے ہیں کہ میں اب بھی کرکٹ کھیل سکتا ہوں۔
دورہ ویسٹ انڈیز کیلئے ٹیم میں شمولیت کے سوال پر لالہ نے انٹرنیشنل کرکٹ چھوڑنے کا اشارہ بھی دیدیا۔ ان کا کہنا تھا کہ جتنی کرکٹ کھیلنی تھی کھیل چکے اب لیگ کو انجوائے کرنا چاہتے ہیں۔ قومی ٹیم کی کپتانی کے حوالے سے شاہد آفریدی نے سرفراز احمد سے متعلق کہا کہ وہ بہترین فائٹر ہیں۔ اگر بورڈ انہیں تینوں فارمیٹ کا کپتان بنانے کا ارادہ رکھتا ہے تو یہ اچھا فیصلہ ہو گا۔ پی ایس ایل سے متعلق آل راؤنڈر کا کہنا تھا کہ لیگ کے تمام میچز صرف لاہور میں نہیں بلکہ کراچی سمیت دیگر شہروں میں بھی ہونے چاہیے۔
