برسبین (آئی این پی)پاکستان کرکٹ ٹیم کے فاسٹ باؤلر جنید خان 19ماہ اور 16دن بعد ون ڈے کرکٹ میں کم بیک کرنے میں کامیاب ہوگئے ہیں۔27سالہ فاسٹ بولر کومحمد عرفان کے متبادل کے طورپر دورہ آسٹریلیاکیلئے پاکستانی ون ڈے اسکواڈ میں شامل کیا گیا تھا ، جس کے بعد پہلے ون ڈے میچ میں اْن پر وہا ب ریاض کو ترجیح دی گئی۔
ملبور ن میں کھیلے جارہے دوسرے ون ڈے میچ میں کپتان کی تبدیلی کیساتھ ساتھ وہاب ریاض باہربیٹھے تو جنید خان کو پلیئنگ الیون میں شامل کیاگیاجس میں وہ چھ اوورزکے پہلے اسپیل میں دونوں اوپنرزڈیوڈوارنراورعثمان خواجہ کو میدان بدر کرنے میں کامیاب رہے جبکہ ریویونہ لینے کے سبب بھی وہ ایک وکٹ سے محروم رہے۔جنید خان نے آسٹریلیا کیخلاف دوسرے ون ڈے میں 8اوورز میں 40رنز دیکر 2وکٹیں حاصل کیں۔اس سے قبل جنید خان نے آخری بار31مئی 2015ء کو زمبابوے کے خلاف لاہورکے مقام پر کھیلے گئے میچ میں پاکستان ٹیم کی نمائندگی کی تھی۔
