نئی دہلی(آئی این پی )بھارتی میڈیا نے مودی سرکار کو پاکستان کی سدرن کمان کے کمانڈر لیفٹیننٹ جنرل عامر ریاض کی جانب سے بھارت کو پاک چین اقتصادی راہداری(سی پیک) کا حصہ بننے کے لئے دی جانے والی دعوت قبول کرنے کا مشورہ دے دیا۔ معروف بھارتی اخبار دی ہندو نے اپنے ایک اداریہ میں بھارتی حکومت کو مشورہ دیا ہے کہ سی پیک کے حوالے سے مخاصمانہ ردعمل ترک کیا جائے۔ بھارتی اخبار نے چین کا بطور عالمی طاقت ، کردار اور کاوشیں بیان کرتے ہوئے کہا ہے کہ ون بیلٹ ون روڈ منصوبہ پاکستان کے مفادات کو تحفظ فراہم کرتا ہے ،بھارت کی پاکستان کو دہشت گردی کے حوالے سے دنیا کے سامنے نیچا دکھانے کی کوششیں ناکام ہو چکی ہیں جبکہ چین بھی بھارت کی جانب سے پاکستان کو دہشت گردوں کا معاون قراردیئے جانے کے حوالے سے کوششوں کی سخت مخالفت کررہا ہے۔

چین نے بھارت کو نیوکلیئر سپلائر گروپ کا حصہ بننے سے بھی روک رکھا ہے۔ ایران نے بھی چاہ بہار کو گوادر کے لئے معاون بندرگاہ قراردینے کی خواہش کا اظہار کیا ہے۔ ترکمانستان اور متعدد وسطی ایشیائی ریاستوں نے بھی گوادر کو ایک ترقی یافتہ بندرگاہ دیکھنے کی خواہش کا اظہار کیا ہے جس کے ذریعے چین نے عالمی تجارت کرنے کا عزم کر رکھا ہے۔ ماسکو میں پاکستان ،چین اور روس کے مابین افغانستان کے حوالے سے ہونے والے مذاکرات نشاندہی کرتے ہیں کہ خطے میں شاہراہیں اور ٹنلز بننے کے علاوہ بہت کچھ تبدیل ہو رہا ہے۔بھارت ون بیلٹ ون روڈ منصوبہ سے دور رہنا برداشت نہیں کر سکتا۔ سی پیک صرف پاکستان کا نہیں بلکہ 64ممالک میں رابطہ سازی قائم کرنے والا ایک منصوبہ ہے۔