میلبورن(آئی این پی)اظہر علی ریکارڈز بک میں نئی انٹریز بھی کرانے لگے وہ آسٹریلیا میں پانچویں بڑی اننگز کھیلنے والے پاکستانی بن گئے فہرست میں ٹاپ پر جگہ بنانے کیلیے مزید 20 رنز درکار ہیں، ان کے پاس کینگروز کیخلاف بیٹ کیری کرنے والا پہلا اوپنر بننے کا بھی سنہری موقع ہے،باکسنگ ڈے ٹیسٹ میں اظہر علی 139 رنز پر ناقابل شکست ہیں، یہ آسٹریلیا میں کسی بھی پاکستانی بیٹسمین کا پانچواں بڑا انفرادی اسکور ہے، اگر انھوں نے 159 رنز بنالیے تو کینگروز کیخلاف سب سے بڑی اننگز کھیلنے والے پاکستانی بیٹسمین بن جائیں گے، اس سے قبل آسٹریلیا میں کوئی بھی ہم وطن بیٹسمین ڈبل سنچری بنانے میں کامیاب نہیں ہو سکا، اس فہرست میں ٹاپ پر موجود ماجد خان نے 1972ء میں میلبورن گراؤنڈ پر ہی 158 رنزبنائے تھے، آصف اقبال 152 ناٹ آؤٹ، محسن خان 152 اور 149، صادق محمد، اعجاز احمد اور اسد شفیق 137،137، عمران خان 136، آصف اقبال134ناٹ آؤٹ، جاوید میانداد 131اور 129 ناٹ آؤٹ، وسیم اکرم 123، مشتاق محمد اور اعجازاحمد 121، آصف اقبال 120، سعید انور 119، انضمام الحق 118، اعجازاحمد 115، قاسم عمر 113، محمد یوسف 111، ماجد خان اور سلمان بٹ 108، صادق محمد 105، حنیف محمد 104، سلمان بٹ 102 اور ظہیر عباس 101 رنز کی اننگز کھیل چکے ہیں۔
اظہر علی کے پاس آسٹریلیا کیخلاف بیٹ کیری کرنے والا پہلا پاکستانی اوپنر بننے کا بھی سنہری موقع ہے، عمران فرحت نے نیوزی لینڈ کیخلاف نیپئر ٹیسٹ 2009میں پوری اننگز میں وکٹ نہیں گنوائی تھی، اس کے بعد اب تک کوئی پاکستانی بیٹسمین یہ کارنامہ سرانجام نہیں دے سکا، اظہر علی نے غیر ایشیائی کنڈیشنز میں اپنے کیریئر کی دوسری سنچری بنائی، اس سے قبل رواں سال ہی اوپنر نے انگلینڈ کیخلاف ایجبسٹن ٹیسٹ میں تھری فیگر اننگز کھیلی تھی، مجموعی طور پر اظہر علی کی 56 ٹیسٹ میں یہ 12 ویں سنچری ہے۔
