ابوظہبی(اے پی پی)پاکستانی ٹیم کے مایہ ناز سپنر یاسر شاہ نے ٹیسٹ کرکٹ کی تاریخ میں ابتدائی 18 میچز میں زیادہ وکٹوں کا بھارت کے ایشون اور کلیری گریمٹ کا ریکارڈ توڑ دیا۔پاکستانی سپنر یاسر شاہ نے ویسٹ انڈیز کیخلاف ابوظہبی ٹیسٹ میں 10 وکٹیں لیکر ایشون اور کلیری گریمیٹ کا ریکارڈ پاش پاش کردیا، ایشون نے 104 اور گریمٹ نے 105 وکٹیں لے رکھی تھیں۔یاسر شاہ اپنے ابتدائی 18 ٹیسٹ میچز میں 112 وکٹیں لیکر آسٹریلیا کے بارنز اور جارج لوہمن کی صف میں کھڑے ہوگئے، بارنز اور لوہمن نے بھی پہلے 18 ٹیسٹ میچز میں 112، 112 وکٹیں لے رکھی ہیں۔پاکستانی اسپنر نے ٹیسٹ کیریئر میں دوسری مرتبہ 10 وکٹیں لینے کا اعزاز حاصل کیا، انہوں نے اس سے قبل رواں برس انگلینڈ کیخلاف لارڈز ٹیسٹ میں 10 وکٹیں لی تھیں۔