اسلام آباد(آئی این پی)پاکستان کر کٹ ٹیم کے جارحانہ اوپنر شرجیل خان نے کہا ہے کہ صرف چوکے، چھکے مارنے پر یقین نہیں رکھتا، بال کو میرٹ پر کھیلنے کی کوشش کرتا ہوں، شاٹ سلیکشن میں کچھ خامیاں ہیں جس کو دور کر نے کیلئے محنت کر رہا ہوں،سعید انور فیورٹ بلے باز ہیں، سابق اوپنر کیساتھ رابطے میں رہتا ہوں اور بہت کچھ سیکھنے کو ملتا ،پی ایس ایل دوسرے ایڈیشن میں بھی اسلام آباد یونائٹیڈ ایک بار پھر چیمپئن بنیگی۔اپنے ایک انٹرویو میں شرجیل خان نے کہا کہ میرا کھیلنے کا میرا اپنا سٹائل ہے، ہر میچ میں کارکردگی دکھانا اور پاکستان کی جیت میں اپنا حصہ ڈالنا چاہتا ہوں، میں اپنی نیچرل گیم کھیلتا ہوں، صرف چوکے، چھکے مارنے پر یقین نہیں رکھتا، بال کو میرٹ پر کھیلنے کی کوشش کرتا ہوں، شاٹ سلیکشن میں کچھ بہتری لانے کی ضرورت ہے، اس پر میں کام کررہا ہوں۔انہوں نے کہا کہ پی ایس ایل کے پہلے ایڈیشن میں اپنی نیچرل گیم کھیلا، کارکردگی اچھی رہی جس کی وجہ سے سلیکٹرز کی نظروں میں آگیا، لیگ نہ صرف میرے بلکہ کئی کھلاڑیوں کی صلاحیتیں نکھارنے کا ذریعہ بنی۔دوسرے ایڈیشن میں بھی اسلام آباد یونائٹیڈ کی طرف سے ہی کھیلوں گا، انشاللہ ایک بار پھر چیمپئن بنیں گے، ہماری ٹیم بہت متوازن اور ہر کھلاڑی اپنی ذمہ داری کا بوجھ اٹھانے کے لیے تیار ہے،تجربہ کار کپتان مصباح الحق کی قیادت بھی فتوحات میں اہم کردار ادا کرتی ہے۔ شرجیل خان نے کہا کہ بائیں ہاتھ سے کھیلنے والے سعید انور فیورٹ ہیں، ان کا سٹائل بہت اچھا اور شاٹ سلیکشن بہترین ہوتی تھی، سابق اوپنر کیساتھ رابطے میں رہتا ہوں اور بہت کچھ سیکھنے کو ملتا ہے، غیرملکی کرکٹرز میں ایڈم گلکرسٹ پسندیدہ ہیں، انہوں نے اپنے کیریئر میں مثبت کرکٹ کھیلی۔انہوں نے کہا کہ ایشیا کے بہت سے ملکوں، سری لنکا، بنگلہ دیش وغیرہ میں کھیل چکا ہوں لیکن انگلینڈ میں کھیل کر بہت مزہ آیا۔

موضوعات:شرجیل خان