کراچی(این این آئی)سابق کپتان جاوید میانداداور شاہد آفریدی کے درمیان لفظی جنگ ختم ہوگئی ہے۔ دونوں کے مشترکہ بڑوں نے کرکٹرز کی صلح کرادی ہے۔ہفتہ کوجاوید میانداداورشاہد آفریدی کے درمیان ملاقات ہوئی ہے۔یہ ملاقات کراچی کے علاقے گلشن اقبال کے شورروم میں ہوئی۔ اس ملاقات میں اقبال محمد علی اور آفریدی کے چچا اقبال شاہ بھی موجود تھے۔اس ملاقات کا انتظام دونوں کے مشترکہ دوست نے کیا۔ ملاقات میں دونوں کرکٹرزگلے بھی ملے۔جاویدمیاندادنے کہاکہ انھوں نے شاہد آفریدی کو پہلے ہی معاف کردیا تھاجبکہ شاہد آفریدی نے بھی معاملہ عدالت میں نہ لے جانے کا فیصلہ کیاہے۔ اس سے قبل شاہد آفریدی نے کہاتھاکہ جاوید میانداد پیسوں کے لیے کھیلتے تھے۔ آفریدی کے اس بیان پر جاوید میانداد نے کہاتھاکہ آفریدی سٹے بازی میں ملوث رہا ہے ۔شاہد آفریدی نے جاویدمیانداد کے خلاف عدالت میں جانے کا فیصلہ کیاتھاتاہم بڑوں کی مداخلت کے بعد یہ معاملے رفع دفع ہوگیاہے۔