نئی دہلی(مانیٹرنگ ڈیسک)ہندئوانتہاپسند وں کی ایک اورنازیباحرکت سامنے آگئی ۔بھارت میں گائے کا گوشت کھانے اور اس کی خریدوفروخت کے مرتکب قرار دے کر گزشتہ کچھ عرصے میں کئی مسلمانوں کو موت کے گھاٹ اتاراگیاہے لیکن اب گجرات کے ”گاؤ سیوا بورڈ“نے مسلمانوں اور عیسائیوں کے دل میں گائے کی خدمت کا جذبہ پیدا کرنے اور اس کا گوشت کھانے سے باز رکھنے کے لیے پیغمبر اسلامﷺ اور حضرت عیسیٰ ؑ کے ساتھ من گھڑت حوالے بھی منسوب کرنے شروع کر دیئے ہیں۔ ٹائمز آف انڈیا کی رپورٹ کے مطابق بورڈ نے کئی پرچے چھپوا کر شہریوں میں تقسیم کیے ہیں اور یہ پیغام اپنی ویب سائٹ پر بھی آویزاں کیا ہے جس میں کہا گیا ہے کہ ” حضرت عیسیٰ ؑ نے کہا تھا کہ گائے کی نسل کو قتل کرنے کا گناہ کسی انسان کو قتل کرنے کے گناہ کے برابر ہے۔“ مسلمانوں کے لیے اس میں پیغام درج کیا گیا ہے کہ ”حضرت محمدﷺ نے کہا کہ ’گائے کا احترام کرو کیونکہ یہ تمام جانوروں میں سب سے بہتر ہے۔ گائے کے دودھ اور گھی میں شفاءہے اور اس کا گوشت کئی طرح کی بیماریوں سے بچاتا ہے۔“ بھارتی انتہا پسندہندئووں کی تنظیم ’’گاؤ سیوا بورڈ ‘‘کے اس سفید جھوٹ پر جمعیت علمائے ہند کے جنرل سیکرٹری مفتی عبدالقیوم حقی کا کہنا ہے کہ ”حضرت محمدﷺ جس عرب خطے میں آئے اور رہے وہاں گائے ہوتی ہی نہیں۔ گاؤ رکھشا مہم سے وابستہ لوگ نبی کریمﷺ کے حوالے سے من گھڑت باتیں پھیلا رہے ہیں۔“دوسری طرف عیسائی پیشوا فادر ایف دورائے نے بھی گاؤ سیوا بورڈ کے دعوے کی تردید کرتے ہوئے کہا ہے کہ ”حضرت عیسیٰ ؑ نے تمام جانوروں سے پیار کرنے کے متعلق بات کی ہے۔ گائے کو انہوں نے کوئی خصوصی اہمیت نہیں دی۔ میرا نہیں خیال کہ حضرت عیسیٰ ؑ نے گائے کا گوشت کھانے سے منع کیا ہو کیونکہ ہماری مذہبی کتابوں میں کہیں بھی اس کا ذکر نہیںملتاہے ۔

موضوعات:‘ ہندئوانتہاپسند