کراچی( آن لائن ) اٹالین ٹریڈ کمیشن نے 3 سال بعداپنا دفترپاکستان میں دوبارہ کھول لیا ہے جوکراچی میں قونصلیٹ کے احاطے میں قائم کیا گیا ہے، معروف کاروباری شخصیت انجینئراے آر داؤدپوتا کی بطور ڈپٹی ٹریڈ کمشنر آئی ٹی اے پاکستان کی حیثیت سے تقرری کردی گئی، ٹریڈکمیشن کا دفتردوبارہ کھولنے پرپاکستان اور اطالوی تاجروں نے خیرمقدم کیا ہے۔اس موقع پر اٹلی کے سفیر ڈاکٹراسٹیفانوپونٹیکورو نے کہا کہ کراچی میں ٹریڈ ایجنسی کا دفتر دوبارہ کھولنا اٹلی کی پاکستان کے ساتھ تعلقات کی حکمت عملی کا حصہ ہے۔ انہوں نے بتایا کہ دسمبر2016 میں اٹلی کے نائب وزیربرائے تجارت 80 اطالوی تاجروں کے بڑے وفد کے ساتھ پاکستان کا دورہ کریں گے جس کا انتظام اٹالین ٹریڈ ایجنسی نے ہی کیا ہے۔انہوں نے توقع ظاہر کی کہ اٹالین ٹریڈ کمیشن دونوں ملکوں کی اقتصادی تعلقات میں اہم موڑ ثابت ہوگا۔ اٹلی کے قونصل جنرل گیانلوکا روباگوٹی نے کہا کہ اطالوی ٹریڈ مشن پاک اٹلی تجارت وکاروباری سرگرمیوں کو نئی بلندیوں تک پہنچانے میں اہم کردار ادا کرے گا۔

موضوعات:اٹلی اور پاکستان