اسلام آباد (ایکسکلوژو رپورٹ)پاک فوج کے سابق سربراہ ریٹائرڈ جنرل اسلم بیگ نے انکشاف کیا ہے کہ حکومت نے آرمی چیف جنرل راحیل شریف کوتوسیع دینے کیلئے اس عہدہ کی مدت4سال کرنے کی پیشکش کی تھی مگر جنرل راحیل نے جواباً اس تجویزپر عملدرآمد اپنے بعد کرنے کاعندیہ دیدیا، اس اصولی موقف سے انکی عزت اور قدرومنزلت میں اضافہ ہواجبکہ یہ ایسی اچھی روایت ہے جو آنیوالوں کیلئے بھی مشعل راہ بنے گی۔خصوصی گفتگومیں انکاکہناتھاکہ جنرل راحیل شریف کی پیشہ ورانہ اہلیت اور جرأت مندانہ اقدامات نے انہیں مقبول فوجی سربراہ بنایا،دہشتگردی کیخلاف آپریشن ضرب عضب،کراچی آپریشن،بھارتی جارحانہ طرزعمل اور سی پیک پر انکے کردار کو تاریخ ہمیشہ یاد رکھے گی، آج ایکسٹینشن کی بات کرنیوالے توسیع ملنے پر انہیں ٹارگٹ کرتے نظر آئینگے جبکہ فضل الرحمن اور اچکزئی کی زبانیں تو پہلے ہی اس حوالے سے بڑی دراز ہیں اوروہ ہرزہ سرائی سے باز نہیں آرہے۔اسلم بیگ نے عمران خان کی جانب سے اسلام آباد بندکرنے کے اعلان کو پاگل پن قرار دیتے ہوئے کہا کہ ایک جانب نریندر مودی پاکستان کیخلاف طبلِ جنگ بجا رہا ہے اور دوسری جانب عمران خان اسلام آباد پر چڑھ دوڑنے کی بات کررہے ہیں۔
انکا یہ عمل اپنی اس فوج کا امتحان لینے کے مترادف ہے جو پہلے سے مشرقی ومغربی سرحدوں اور کشمیر کے محاذ پر ڈٹی ہوئی ہے ، دھرنالندن پلان کے تحت دیاگیااور اب اس حساس صورتحال میں عمران کا حکومت کیخلاف اعلانِ جنگ ملکی استحکام کو پارہ پارہ کرنے کے مترادف ہوگا،وہ خبروں کو جس سمت لیجانا چاہتے ہیں وہ دشمن کاایجنڈاتوہوسکتا ہے لیکن محبّ وطن قیادت کا نہیں،انہیں ہوش کے ناخن لینے چاہئیں اور وہ حکومت گرانے کیلئے اتنا آگے نہ جائیں کہ انہیں لینے کے دینے پڑ جائیں، فوج نے تو آئینی طور پر بیرونی اور اندرونی خطرات سے نمٹنا ہے لہٰذاموجودہ حالات میں وہ اسلام آباد میں غیرمعمولی صورتحال طاری کرنے کی اجازت نہیں دیگی۔سابق فوجی سربراہ نے کنٹرول لائن کی صورتحال کے حوالہ سے کہا کہ بھارت کشمیریوں کی آواز دبا نہیں سکتا، طاقت کے استعمال کا مقصد یہ ہے کہ اسے کشمیر کے بعد خالصتان کی تحریک بھی نظر آرہی ہے اور کس کس کو روکیں گے ،مودی کے چہرے پربوکھلاہٹ بہت کچھ بتا رہی ہے ،انڈیاکی جارحانہ اہلیت محدود ہو چکی اوراب اسے اپنے دفاع کی فکر کھائے جارہی ہے ،دھمکیاں دینے والی بھارتی قیادت جلد امن اور مذاکرات کی طرف آئیگی،کشمیرکا مسئلہ جتنی جلد حل کر لے خود بھارت کیلئے ہی بہتر ہوگا ورنہ آزادی کی تحریکوں کا عمل پورے ہندوستان کو اپنے گھیرے میں لینے والا ہے ،جس علاقہ کے ہر گھر میں شہیدوں کے وارث بیٹھے ہیں وہ بھارت کو دن میں تارے دکھادینگے ، لہٰذا مودی سرکارنوشتہ دیوار پڑھے جس پر لکھا ہے کہ’’تری بربادیوں کے مشورے ہیں آسمانوں پر‘‘۔