اسلام آباد ( مانیٹرنگ ڈیسک ) آسٹریلوی کرکٹ ٹیم کے سابق سپنر جان گلیسن انتقال کر گئے، ان کی عمر 78 برس تھی۔ گلیسن آسٹریلیا کے 242 ویں ٹیسٹ کرکٹر تھے اور انہیں 1967ء سے1972ء کے دوران 29ٹیسٹ میچز میں ملک کی نمائندگی کرنے کا اعزاز حاصل ہوا جس میں 36کی اوسط سے 93وکٹیں حاصل کیں اس کے علاوہ انہوں نے 1966ء سے 1975ء کے دوران 116فرسٹ کلاس میچز میں 430وکٹیں بھی لے رکھی تھیں ۔
دوسری جانب دنیائے کرکٹ کو آج ایک اور صدمہ اس وقت برداشت کرنا پڑا جب جنوبی افریقہ کے مقامی کرکٹر لوکھانیا ٹسیکی دل کا دورہ پڑنے سے انتقال کرگئے ہیں۔ فورٹ ہیئر اکیڈمی کے 22سالہ کھلاڑی لوکھانیاٹسیکی اپنی روز مرہ ٹریننگ کے بعد سستانے کے لیے بیٹھے تو اچانک کھانستے کھانستے نیچے گر گئے جس کے بعد انہیں فوری طور پر ایلس ہسپتال منتقل کیا گیا جہاں وہ اسی دن انتقال کرگئے ۔کرکٹ جنوبی افریقہ کے چیف ایگزیکٹیو ہارون لورگاٹ نے واقعے پر افسوس کا اظہار کرتے ہوئے کہا کہ آج کا دن جنوبی افریقی کرکٹ کیلئے غم کا دن ہے ،وہ ٹسیکی کے اہل خانہ سے ہمدردی کا اظہار کرتے ہیں اور ان کی ہر طرح سے مدد کرنے کے لیے تیار ہیں‎