اسلام آباد(مانیٹرنگ ڈیسک) سپریم کورٹ نے پی پی اٹھہتر جھنگ سے ن لیگ کی راشدہ یعقوب کو نا اہل قرار دیتے ہوئے حلقے میں دوبارہ انتخاب کا حکم دے دیا۔جسٹس دوست محمد نے راشدہ یعقوب کی اپیلوں پر چار مارچ کو محفوظ کیا گیا فیصلہ پڑھ کر سنایا، عدالت نے ن لیگ کی رہنما راشدہ یعقوب کو نا اہل قرار دیتے ہوئے پی پی اٹھہتر جھنگ میں دوبارہ انتخاب کرانے کا حکم دیا ہے۔ راشدہ یعقوب کیخلاف اہلسنت والجماعت کے سربراہ احمد لدھیانوی نے الیکشن ٹربیونل میں درخواست دائر کی تھی۔ الیکشن ٹربیونل نے اثاثے چھپانے پر راشدہ یعقوب کو نا اہل قرار دیا تھا، جس کے خلاف راشدہ یعقوب نے سپریم کورٹ سے رجوع کیا۔ تاہم عدالت عظمیٰ نے اپیلیں خارج کر دیں۔
واضح رہے کہ چیئرمین عمران خان نے کہا ہے کہ کیپٹن(ر)صفدر کے خلاف بیوی کے اثاثے چھپانے کا مقدمہ دائر کر دیا ہے،عمران خان نے کہا ہے کہ قوم منتظرہے کہ الیکشن کمیشن اپنے قوانین پر عمل کرتا ہے یا نہیں، نیب پانامہ پیپرز ثبوت آنے کے باوجود کارروائی کیوں نہیں کر رہا۔ جمعرات کو سماجی رابطوں کی ویب سائٹ پر اپنے ٹوئیٹر پیغام میں تحریک انصاف کے چیئرمین عمران خان نے کہا کہ کیپٹن(ر)صفدر کے خلاف بیوی کے اثاثے چھپانے کا مقدمہ دائر کر دیا ہے، قوم کو الیکشن کمیشن کی جانب سے قانون پر عملدرآمد کا انتظار ہے۔ انہوں نے کہا کہ قوم منظر ہے کہ الیکشن کمیشن اپنے قوانین پر عمل کرتا ہے یا نہیں۔ عمران خان نے کہا کہ نیب پانامہ پیپرز ثبوت آنے کے باوجود کارروائی کیوں نہیں کر رہا، نیب کو ایسے کیسز میں قانون کے مطابق کارروائی کرنی چاہیے، نیب چیف نے پانامہ پیپرز پر کارروائی نہ کی تو یہ قانوناً جرم ہو گا۔

موضوعات:مسلم لیگ ن نا اہل