اسلام آباد(مانیٹرنگ ڈیسک) انٹرنیٹ کمپنی یاہو نے امریکی خفیہ اداروں کے حکم پر کروڑوں صارفین کی ای میلز کو اسکین کیاہے ،میڈیارپورٹس کے مطابق بتایا گیا ہے کہ یاہو کی جانب سے یہ نگرانی گزشتہ برس کے دوران کی گئی تھی۔ یاہو کو قومی سلامتی کے امریکی ادارے’این ایس اے‘ وفاقی تفتیشی ادارے (ایف بی آئی) کی جانب سے ایسا کرنے کے لیے کہا تھا۔ یاہو کے تین ایسے سابق اور ایک نا معلوم اہلکار کے حوالے سے بتایاگیا کہ امریکی حکام کی جانب سے یاہو پر زور ڈالا گیا کہ وہ ایسی ای میلز کو اسکین کرے جن میں مخصوص حروف یا اصلاحات استعمال کی گئی ہوں۔ اس مقصد کے لیے یاہو نے امریکی حکومت کی درخواست پر ایک خصوصی سافٹ ویئر پروگرام بھی تیار کیا تھا۔ اس رپورٹ پر امریکی محکمہ انصاف اور ایف بی آئی کی جانب سے ابھی تک کوئی رد عمل سامنے نہیں آیا ہے۔ تاہم رابطہ کرنے پر یاہو نے اس رپورٹ کو مسترد تو نہیں کیا مگر یہ ضرور کہا کہ کمپنی امریکی قوانین کے دائرے میں رہتے ہوئے ہی تمام کام کرتی ہے۔ دوسری طرف گوگل کمپنی نے کہا ہے کہ انہیں امریکی حکام کی جانب سے آج تک اس قسم کی کوئی درخواست موصول نہیں ہوئی ہے۔ گوگل کی ’جی میل‘ دنیا کی سب سے بڑی ای میل سروس ہے۔ گوگل کے مطابق اگر ای میل کی جاسوسی کے لیے ان سے رابطہ کیا جاتا تو وہ اس سے فوری طور پر انکار کر دیتے۔ اسی طرح مائیکرو سافٹ نے بھی کہا ہے کہ ان کی جانب سے کبھی صارفین کی ای میلز کی خفیہ نگرانی نہیں کی گئی۔
دوسری جانب سال 2016ء کا فزکس کا نوبل انعام برطانیہ میں پیدا ہونے والے تین سائنسدانوں ڈیوڈ تھاؤلیس، ڈنکن ہولڈین اور مائیکل کوسٹرلِٹز کو مشترکہ طور پر دینے کا اعلان کیا گیا ہے۔ میڈیارپورٹس کے مطابق ان سائسندانوں کو یہ انعام مادے کی غیر معمولی حالتوں مثلاسپر کنڈکٹرز وغیرہ سے متعلق ان کی تحقیق پر دیا گیا ہے۔ نوبل انعام دینے والی رائل سویڈش اکیڈمی آف سائنسز کے مطابق اس میدان میں ان کے بنیادی کام کے بعد اب مادے کی مزید اجنبی حالتوں کی تلاش کا کام جاری ہے۔ نوبل انعام کے ساتھ آٹھ ملین سویڈش کراؤن کی رقم دی جائے گی، جو نو لاکھ 37 ڈالرز کے برابر بنتی ہے۔