اسلام آباد(مانیٹرنگ ڈیسک) پاکستان تحریک انصاف کے چیئر مین عمران خان نے اپنے 30 ستمبر کے تاریخی جلسے میں جہاں ایک طرف تو جلسے میں کرپشن کے خلاف باتیں کر کے اپنے سیاسی ایجنڈے کو آگے بڑھایا وہیں دوسری جانب بھارتی وزیراعظم مودی کو للکار  نے بھارتیوں کے ہوش اڑ ا دیئے ۔ عمران خان نے اپنے خطاب میں واضح الفاظ میں کہا کہ مودی سن لو، پاکستانی قوم اور فو ج ایک ہیں اور تم پاکستان کابال بھی بیکا نہیں کر سکتے ۔

عمران خان نے مزید کہا کہ بھارت کشمیر میں مظالم بند کر کے کشمیریوں کو ان کے جائز حقوق دینے ہی پڑیں گے اور کشمیر کو آزادی بھی دینا پڑے گی۔ عمران خان نے اپنے خطاب میں مزید کہا کہ بھارت میں اگر چھوٹا سا بم دھماکہ بھی ہو جائے تو بھارت رونا شروع کر دیتا ہے اور اس کا الزام پاکستان پر لگانا شروع کر دیتا ہے ، اپنی اتنی بڑی فوج کے ہوتے ہوئے وہ پاکستان پر دراندازی کا بچگانہ الزام لگاتا ہے اور اس طرح اپنی ہی فوج کی نااہلی کا اعتراف بھی کرتا ہے۔

Imran Khan Is Hafiz Saeed Of Politics….. by awaizp9

عمران خان کے اس اصولی موقف پر بھارتی میڈیا سیخ پا  ہو گیا  اور عمران خان کو حافظ سعید سے تشبیہ دے ڈالی، بھارتی میڈیا کے مطابق پاکستان میں دو حافظ سعید ہیں ایک تو اسلحے کے زور پر بھارت کو دھمکیاں دیتا ہے اور دوسرا حافظ سعید سیاست کا حافظ سعید ہے جو سیاست کے پلیٹ فارم سے بھارتی وزیراعظم کو دھمکیاں دے رہا ہے ۔

بھارتی میڈیا پر عمران خان کی مختلف تقاریر اور حافظ سعید احمد کی تقاریر کے کلپس چلا کر ان میں مشترکہ باتوں کو خوب اچھالا جا رہا ہے ۔ واضح رہے کہ عمران خان نے دھرنے سے پہلے اعلان کیا تھا کہ پہلے ہم یہ دھرنا پاکستان مسلم لیگ کے سربراہ اور وزیراعظم پاکستان کے خلاف کرپشن الزامات اور ان کی تحقیقات کے لئے کرنے جا رہے تھے مگر اب ہم بھارتی وزیراعظم مودی کی دہشت گردیوں کے خلاف بھی دنیا کو پیغام دیں گے۔ عمران خان کے علاوہ پی ٹی آئی کے دیگر رہنماؤں کی جانب سے بھی بھارت کی جانب سے کشمیریوں پر جاری مظالم اور اڑی سیکٹر حملے کے بعد دی جانے والی گیڈر بھبھکیوں کے خلاف خوب کھل کر تقاریر کی گئیں جس  پر بھارتی میڈیا کو بری طرح مرچیں لگی ہوئی ہیں ۔