اسلام آباد( مانیٹرنگ ڈیسک ) گزشتہ روز لائن آف کنٹرول کی خلاف ورزی کرتے ہوئے بھارت نے پاکستان کے دو جوان شہید کر ڈالے تھے جس کے بعد پاکستان نے ایکشن لیتے ہوئے 6 بھارتیوں کو جہنم واصل کیا ۔ حالات کشیدہ ہوتے دیکھ کر بھارت نے لائن آف کنٹرول کی خلاف ورزی کو سرجیکل سٹرائیک کا نام دے کر اپنا دامن بچانے کی کوشش کرتے ہوئے دعویٰ کیا ہے اس نے سرجیکل سٹرائیک بارے چین ، امریکہ، روس،برطانیہ اور فرانس سمیت 25ملکوں کے سفیروں کو بریفنگ دی ہے ۔بھارتی میڈیا کی رپورٹ کے مطابق وزارت خارجہ کے ترجمان ویکاس سواروپ نے کہا ہے کہ سیکرٹری خارجہ ایس جے شنکر نے ساؤتھ بلاک میں امریکہ ، چین ، روس ، برطانیہ اور فرانس سمیت 25ملکوں کے سفیروں کو کنٹرول لائن پر سرجیکل سٹرائیک کے بارے میں بریفنگ دی اور انہیں بتایا کہ یہ فوجی کارروائی سے زیادہ انسداد دہشت گردی کی مخصوص کارروائی تھی اور اس میں ان دہشت گردوں کو ہلاک کیا گیا جنہیں جموں وکشمیر اور بھارت کے دوسرے شہروں میں حملوں کیلئے تربیت دی گئی تھی۔ سفیروں کو یہ بھی بتایا گیا کہ بھارت کا ابھی تک اس طرح کی مزید کسی کارروائی کا کوئی ارادہ نہیں ہے تاہم مسلح افواج دہشت گردوں کو کسی حملے کی اجازت نہیں دینگے۔