اسلام آباد (مانیٹرنگ ڈیسک) پاک بھارت کشیدگی بڑھتی جا رہی ہے جس نے بھارتی فلم انڈسٹری کو بری طرح متاثر کیا ہے ۔ اس حوالے سے کرن جوہر جنہیں کافی عرصہ سے ہندو انتہا پسند تنظیموں کی جانب سے پاکستانی اداکاروں کو لے کر فلمیں بنانے کے حوالے سے دھمکیاں دی جا رہی تھیں ان کے گھر کے باہر ہندو انتہا پسندوں نے احتجاج کیا ہے جبکہ کچھ ذرائع کے مطابق کرن جوہر کے گھر کے باہر پتھرائو بھی کیا گیا ۔ جس سے ان کے گھر کو شدیدنقصان بھی پہنچا ۔ بھارتی میڈیا کے مطابق کرن جوہر کے گھر کے باہر سیکورٹی بڑھادی گئی ہے ۔بھارتی انتہا پسند تنظیم مہاراشٹر نونرمان سینانےممبئی میں کرن جوہر کے گھر کے باہر پاکستانی فنکاروں کےحق میں دئیے گئے بیان کے خلاف مظاہرہ کیا ،جس کے بعدمعروف فلم پروڈیوسر کے گھر کے باہر سیکورٹی بڑھادی گئی ہے ۔بھارتی میڈیا رپورٹس کے مطابق معروف ہدایت کار کرن جوہر نے کہا ہے کہ اڑی حملے کے بعد بھارتی لوگوں میں پائے جانے والے غصہ اور غم کو سمجھ سکتا ہوں، لیکن پاکستانی اداکاروں پر پابندی دہشت گردی جیسے مسئلے کا حل نہیں ہے کیونکہ فن اور آرٹ کو قید نہیں کیا جا سکتا۔انہوں نے مزیدکہا کہ پاکستانی فنکاروں کے حق میں کھل کر بات کرنے سے انھیں خطرہ بھی ہو سکتا ہے لیکن وہ جو بات ٹھیک سمجھتے ہیں، اس کا سب کے سامنے اظہار کرنے کا حق رکھتے ہیں۔