اسلام آباد(مانیٹرنگ ڈیسک)پولیس کا کہنا ہے کہ قندیل بلوچ قتل کیس میں نامزد مفتی عبدالقوی روپوش ہوگئے ہیں ان کی گرفتاری کے لئے خصوصی ٹیم تشکیل دے دی گئی ہے۔ ذرائع کے مطابق مقتول ماڈل قندیل بلوچ کے قتل میں نامزد مفتی عبدالقوی کی گرفتاری کے لئے پولیس نے ٹیم تشکیل دے دی ہے۔ پولیس کا کہنا ہے کہ مفتی عبدالقوی کو مقتول قندیل بلوچ کے والد کی درخواست پرعدالتی حکم کے مطابق مقدمے میں نامزد کیا گیا تھا تاہم ان سے تفتیش کے لئے جب رابطہ کیا گیا تو ان کا موبائل بند تھا اور وہ اپنی رہائش گاہ میں بھی موجود نہیں، ایسا لگتا ہے جیسے مفتی عبد القوی شہر سے فرار ہو گئے ہیں ۔ پولیس کے مطابق پولیس نے مفتی عبدالقوی کی گرفتاری کے لئے شواہد اکٹھے کرنا شروع کردیئے ہیں اوران کی روپوشی کے بعد ان کی گرفتاری کیلئے خصوصی ٹیم بھی تشکیل دے دی گئی ہے جلد ہی مفتی عبدالقوی کو گرفتار بھی کرلیا جائے گا ۔