اسلام آباد(مانیٹرنگ ڈیسک) جرمنی میں ترک صدر طیب اردوگان کے ہزاروں حامیوں نے ان کے حق میں مظاہرہ کیا اور ریلی نکالی، اس موقع پر اردگان مخالف مظاہرین سے جھڑپیں بھی ہوئیں تاہم پولیس نے صورت حال پر بروقت قابو پالیا۔غیر ملکی میڈیا کے مطابق جرمنی کے شہر کولون میں ہزاروں ترک باشندوں نے ترکی میں ناکام فوجی بغاوت کے خلاف اور ترک صدر طیب رجب اردوان کے حق میں ریلی نکالی۔ریلی میں ترک کے کھیلوں کے وزیر نے بھی شرکت کی۔ریلی میں شریک افراد ترک پرچم اٹھائے ہوئے تھے اورترکی اور جرمنی کے قومی ترانے گارہے تھے جبکہ کچھ لوگوں نے بینرز بھی اٹھا رکھے تھے جن پر اردگان کے حق میں نعرے درج تھے۔
ریلی میں شریک افراد کا کہنا تھا کہ وہ جمہوریت کے حق میں اور فوجی بغاوت کے خلاف ہیں اور اس ریلی کا مقصد ترک عوام کو یہ پیغام دینا ہے کہ ہم جمہوریت کے دفاع میں ان کے ساتھ ہیں۔دوسری جانب طیب اردوان کی پالیسیوں کے خلاف ترکوں اور کردوں کے ایک گروپ نے بھی مظاہرہ کیا۔ مظاہرین کا کہنا تھا کہ وہ اردوان کی آمریت کے خلاف ہیں کیونکہ وہ کردوں آرمینیائی باشندوں اور دیگر اقلیتوں کو ظلم کا نشانہ بنارہے ہیں۔اس موقع پر کشیدگی بھی دیکھنے میں آئی اور کئی مواقعوں پر دونوں گروپوں کے درمیان جھڑپ بھی ہوئی تاہم پولیس نے بروقت کارروائی کرتے ہوئے معاملات کو قابو میں رکھا۔