نیند کی کمی یوں تو ذہنی سکون برباد کرنے کے ساتھ ساتھ کئی مسائل کا سبب بنتی ہے، نیند کی کمی کے باعث ذیابیطس میں مبتلا ہونے کا خدشہ بڑھ جاتا ہے۔ امریکا کی شکاگو یونیورسٹی میں ہونے والی ایک تحقیق کے مطابق نیند کی کمی کے شکار افراد کے خون میں فیٹی ایسڈز کی مقدار میں بتدریج اضافہ اورانسولین کی صلاحیت کم ہوجاتی ہے۔ تحقیق کے دوران ماہرین نے 18 سے 30 برس کی عمر کے 19 افراد کے روز مرہ معمولات کا تجزیہ کیا۔ ماہرین نے دیکھا کہ مسلسل 3 روز صرف 4 گھنٹے کی نیند لینے سے ان کے خون میں فیٹی ایسڈز کی مقدار میں بتدریج اضافہ اور انسولین کی صلاحیت کم ہوتی گئی۔ ماہرین کا کہنا ہے کہ نیند کی کمی خون میں فیٹی ایسڈز کی سطح کو بڑھا دیتی ہے، جس کے باعث میٹابولزم کا عمل متاثر ہوتا ہے اور خون میں انسولین بنانے کی صلاحیت کم ہوجاتی ہے جوکہ خون میں شوگر کی مقدار کنٹرول کرتی ہے۔ تحقیق میں مزید بتایا گیا ہے کہ جسمانی طور پر زیادہ متحرک رہنے کے باوجود اگر نیند پوری نہ کی جائے تو صحت کو سنگین خطرات لاحق ہوسکتے ہیں۔