واشنگٹن(این این آئی) اچانک بات بڑھ گئی،امریکا کا روس کیخلاف انتہائی اقدام،امریکی محکمہ خارجہ نے کہاہے کہ گزشتہ ماہ ماسکو میں امریکی سفارتکار پر حملے کے جواب میں دو روسی سفارتکاروں کو امریکا سے نکال دیا گیا ہے۔غیرملکی خبررساں ادارے کے مطابق امریکا کی جانب سے یہ اقدام اس وقت اٹھایا گیا ہے جب روس میں موجود امریکی سفارتکاروں اور ان کے اہلخانہ کو ہراساں کرنے کے واقعات میں اضافہ ہورہا ہے۔اسٹیٹ ڈیپارٹمنٹ کے ترجمان جان کربی کا کہنا تھا کہ دونوں سفارتکاروں کو 17 جون تک امریکا چھوڑنے کا حکم دیا گیا تھا۔انہوں نے کہا کہ 6 جون کو ماسکو میں امریکی سفارتخانے کے قریب امریکی سفارتکار کی جانب سے اپنی شناخت کرنے کے بعد روسی پولیس اہلکار نے ان پر حملہ کیا تھا۔انہوں نے مزید کہا کہ یہ واقعہ ہمارے سفارتکاروں کی جان و مال کے لیے خطرے کا باعث ہیں، جبکہ روس کا دعویٰ ہے کہ روسی پولیس نے امریکی سفارتکاروں کی سیکیورٹی کو یقینی بنانے کے لیے اقدام کیا تھا اور امریکی سفارتکاروں کی شناخت کے بعد ان کو ہراساں کرنے کی خبر درست نہیں۔دوسری جانب روس کا کہنا ہے کہ امریکی سفارتکار خفیہ ایجنسی سی آئی اے کے لیے کام کرتا تھا اور اس نے پولیس کو شناخت دکھانے سے انکار کیا تھا۔روسی سرکاری ٹی وی چینل نے امریکی سفارتکار اور روسی پولیس اہلکار کے درمیان جھگڑے کی ویڈیو بھی جاری کی جس میں سیکیورٹی گارڈ نے ٹیکسی میں بیٹھے شخص پر شناخت کروانے سے انکار پر اس پر حملہ کرتے ہوئے دکھایا گیا ہے۔اس حوالے سے جان کربی نے کہا کہ روسی سیکیورٹی اہلکار ہمارے امریکی سفارتکاروں کو ہراساں کرنے اور ہمارے سفارتی معاملات میں مداخلت کرنے کی کوشش کررہے ہیں۔انہوں نے کہا کہ ماسکو امریکی سفاررتکاروں کو ہراساں کرنا بند کرے۔انہوں نے متاثرہ امریکی سفارتکاروں کی حالت کے بارے میں مزید بتانے سے انکار کردیا۔