اسلام آباد(مانیٹرنگ ڈیسک)ہاکی کی عالمی تنظیم “ایف آئی ایچ “نے ہاکی کی تازہ رینکنگ کا اعلان کر دیا جس کے تحت ورلڈ چیمپین آسٹریلیا بدستور پہلے اور ہالینڈ دوسری پوزیشن پر برقرار ہے، بھارت حیران کن طور پر دو ددرجہ ترقی کیساتھ پانچویں نمبر پر آ گیا جبکہ رینکنگ میں پاکستان اپنی دسویں پوزیشن کو بہتر نہ بنا سکا ۔ انٹرنیشنل ہاکی فیڈریشن کی جانب سے جاری ہاکی کی تازہ رینکنگ کے مطابقورلڈ چیمپین آسٹریلیا 2179پوائنٹس کیساتھ پہلی ، ہالینڈ 1838پوائنٹس کیساتھ دوسری ،جرمنی 1701پوائنٹس کیساتھ تیسری اور انگلینڈ 1550پوائنٹس کیساتھ چوتھی پوزیشن پر بد ستور قدم جمائے ہوئے ہیں ، رینکنگ میں بھارت نے 1543پوائنٹس کیساتھ دو درجہ ترقی کرتے ہوئے ساتویں سے پانچویں نمبر پر آ گیا ہے، بیلجیم 1475پوائنٹس اور ارجنٹائن 1436پوائنٹس کیساتھ ایک، ایک درجہ تنزلی کرتے ہوئے چھٹے اور ساتویں نمبر پر آ گئے ہیں ، نیوزی لینڈ کی ٹیم 1308پوائنٹس کیساتھ آٹھویں ، کوریا 1200پوائنٹس کیساتھ نویں نمبر پر ہے جبکہ پاکستان 1073پوائنٹس کیساتھ دسویں پوزیشن پر ہے ، اسپین 1028پوائنٹس کیساتھ گیارہویں ،آئر لینڈ 969پوائنٹس کیساتھ بارہویں ، ملائشیا 950پوائنٹس کیساتھ 13ویں جبکہ چین 595پوائنٹس کیساتھ 18ویں نمبر پر ہے ۔