اسلام آباد(نیوز ڈیسک) پاکستان الیکٹرانک میڈیا ریگولیٹری اتھارٹی (پیمرا) نے نجی ٹی وی چینل جیو انٹرٹینمنٹ پر ڈاکٹرعامر لیاقت کے پروگرام ’انعام گھر‘ پر تین روز کیلئے عارضی پابندی عائد کرد ی ، یہ پابندی خودکشی کے مناظر دکھانے پر لگائی گئی اور اس ضمن میں پیمرا نے چینل سے 21جون تک جواب طلب کیاتھا لیکن اب پیمرا کی جانب سے جاری نوٹیفکیشن کے مطابق پروگرام پر تین روز تک کے لیے پابندی عائد کردی گئی اور خبردار کیاگیا کہ اگر پابندی کی خلاف ورزی کی گئی تو چینل ہی بند کردیا جائے گا۔پیمرا شکایات کونسل سندھ نے پروگرام پر پابندی لگانے کا اعلان کیا جس کا اطلاق منگل سے جمعرات تک ہوگا اور ایسا نہ کرنے کی صورت میں چینل کو بند کرنے کا کہا گیا۔پیمرا کے نوٹیفکیشن کے مطابق 6 جون کو جیو انٹرٹینمنٹ کے اس پروگرام میں ایک لڑکی کی پنکھے سے لٹک کر خودکشی کے مناظر دکھانے اور ایک مہمان کے محض جیتنے کی لالچ میں گالی نکالنے جو کہ براہ راست نشر ہوئی جبکہ 25 جون کو ایک خاتون کالر کی نامناسب گفتگو آن ائیر جانے کے مناظر کو کونسل نے دیکھا،اسی طرح ایک کونسل ممبر نے میزبان کی کھمبے کے ساتھ لپٹ کر گانا سننے کی تفصیلات بھی دیگر ممبران کے ساتھ شیئر کیں۔مذکورہ ٹی وی چینل نے پروگرام کے خلاف موصول سینکڑوں شکایات پر تفصیلی جواب کے لیے 15 دن کا وقت مانگا تھا جس پر عید کی چھٹیوں کے بعد جواب دائر کرنے کی ہدایت کی گئی تاہم ضابطہ اخلاق کی مسلسل خلاف ورزی پر پیمرا نے انعام گھر پر 28 سے 30 جون تک پابندی عائد کردی ہے جبکہ چینل کو آن ائیر معذرت نشر کرنے کی ہدایت بھی کی گئی۔پیمرا نے یہ بھی کہاہے کہ میزبان عامر لیاقت خود آن ایئرناظرین سے معافی مانگیں اور اور آئندہ ضابطہ اخلاق کی خلاف ورزی نہ کرنے کی یقین دہانی کرائیں ، ایسا نہ کرنے کی صورت میں پروگرام پر غیرمعینہ مدت تک کے لیے پابندی لگادی جائے گی۔