لندن(این این آئی)پاکستان کرکٹ ٹیم کے ہیڈ کوچ مکی آرتھر نے کہاہے کہ کھلاڑیوں کی جانب سے روزے کی حالت میں کئی کئی گھنٹے کی سخت ٹریننگ میں حصہ لینا قابل تعریف ہے۔برطانوی اخبار کو انٹرویو میں ہیڈ کوچ مکی آرتھرنے کہا کہ مصباح الحق اور یونس خان کی جانب سے درخواست کی گئی تھی کہ وہ اپنی عبادت کو اپنی تربیت پر اثر انداز نہیں ہونے دیں گے اس لئے انہیں اجازت دی جائے کہ کھیل کے ساتھ اپنی عبادات کو بھی جاری رکھ سکیں۔ رمضان المبارک میں روزے رکھ کر کھلاڑیوں کا سخت ٹریننگ میں حصہ لینا ان کیلئے بہت حیران کن تھا اور وہ اس سے بہت متاثر ہوئے ہیں۔ہیڈ کوچ کے مطابق 2010 کی تلخ یادوں کو بھلانے اور اس کے ازالے کیلئے پوری ٹیم سخت محنت کررہی ہے اور انگلینڈ کوشکست سے دوچار کرنے کو تیار ہے ۔ مصباح الحق کی قیادت میں پوری ٹیم متحد ہے اور ٹیم میں بے مثال اور اعلیٰ صلاحیتوں کے مالک کھلاڑی موجود ہیں جو اپنے منفرد کھیل اور انداز کی بدولت کھیل کا پانسہ پلٹ سکتے ہیں۔ امید ہے کہ انگلینڈ کے خلاف ہونے والی سیریز دلچسپ اور بہترین ہوگی