ایڈیلیڈ: قومی کرکٹ ٹیم جس طرح ورلڈ کپ میں بھارت کے ہاتھوں شکست کی روایت نہ توڑ سکی اسی طرح ایڈیلیڈ کرکٹ گراؤنڈ میں مسلسل ناکامیوں کا ریکارڈ توڑنے میں بھی ناکام رہی۔

گرین شرٹس نے ایڈیلیڈ اوول میں اب تک 15 میچز کھیلے ہیں جس میں سے 11 میں ناکامی ، 3  میں کامیابی اور ایک میچ کا فیصلہ نہ ہوسکا۔ آخری مرتبہ اس گراؤنڈ میں قومی ٹیم نے 1981 میں ویسٹ انڈیز کو صرف 140 رنز بنانے کے باوجود شکست دی تھی لیکن قومی ٹیم ایک مرتبہ پھر ایڈیلیڈ اوول میں اپنے ماتھے پر لگے شکست کے داغ کو نہ دھو سکی اور بھارت کے ہاتھوں باآسانی شکست کھا بیٹھی۔

یہ وہی گراؤنڈ ہے جہاں 1992 کے ورلڈ کپ کے گروپ میچ میں قومی ٹیم انگلینڈ کے خلاف اپنے کم ترین اسکور 74 پرپویلین لوٹ گئی تھی لیکن خوش قسمتی سے بارش کے باعث میچ کا فیصلہ نہ ہوسکا اور ایک اور شکست کا سہرا ماتھے پر سجانے سے قومی ٹیم بال بال بچ گئی۔ آخری مرتبہ 2010 میں قومی ٹیم کو آسٹریلیا کے خلاف اسی گراؤنڈ میں ناکامی کا سامنا رہا جبکہ بھارت اور پاکستان کی ٹیمیں آخری مرتبہ 2000 میں ایڈیلیڈ اوول میں آمنے سامنے آئیں اور شکست کا سامنا قومی ٹیم کو ہی کرنا پڑا۔

2015 کے ورلڈ کپ کے گروپ میچز میں پاکستان کا آئندہ میچ آئرلینڈ کے خلاف ٹھیک ایک ماہ بعد اسی مقام پر اور اسی وقت ہونا ہے یعنی 15 مارچ بروز اتوار اور ٹھیک ساڑھے آٹھ بجے، تو کیا قومی ٹیم آئرلینڈ کے خلاف اپنی روایت توڑنے میں کامیاب ہوگی یا اسی روایت کا تسلسل برقرار رکھے گی۔