اسلام آباد(این این آئی)آل پاکستان مسلم لیگ کے سیکرٹری جنرل ڈاکٹر محمدامجد نے کہاہے کہ آسیہ اسحٰق کو ڈسپلن کی خلاف ورزی پر28جنوری 2016کوعہدے سے سبکدوش کردیا گیا تھا۔ان کو سبکدوش کئے جانے کا باقاعدہ نوٹفکیشن جاری کیاگیاتھا۔وہ اے پی ایم ایل یا پارٹی سربراہ جنرل(ر)پرویز مشرف کی ترجمان نہیں رہی تھیں،پارٹی سے کسی کے جانے سے پرویز مشرف کے مشن پر فرق نہیں پڑتا،ہم مخلص لوگوں کو ساتھ لے کر چلنا چاہتے ہیں،دوسری جماعت میں شمولیت اختیار کرنے والوں نے ثابت کردیا وہ پرویزمشرف سے نہیں،عہدوں سے محبت کرنے والے لوگ ہیں۔پرویز مشرف سے محبت کرنے والے لوگوں کو ساتھ لے کر پارٹی کو ناقابل تسخیر بنائیں گے۔ان خیالات کا اظہار انہوں نے گزشتہ روز اے پی ایم ایل کے راہنماؤں کے دوسری جماعت میں شمولیت اختیار کرنے پراپنے ردعمل پر مبنی بیان میں کیا۔انہوں نے کہا کہ آسیہ اسحٰق آل پاکستان مسلم لیگ یا جنرل(ر)پرویز مشرف کی ترجمان نہیں تھیں،انہیں ڈسپلن کی خلاف ورزی کرنے اور پارٹی کی ساکھ کو نقصان پہنچانے کی بنا پر چار ماہ قبل ذمہ داری سے سبکدوش کردیا گیا تھا۔ان کا کہنا تھا کہ آسیہ اسحٰق کے حواریوں کو بھی انہی وجوہات کی بنا پر پارٹی سے نکالا جارہا تھا۔ ان لوگوں کے پارٹی چھوڑ کر جانے سے صاف ظاہر ہوگیا کہ یہ پرویز مشرف کے مشن سے مخلص نہیں تھے۔ان لوگوں کو عہدے عزیز تھے۔ یہ اچھا ہوا کہ ان لوگوں نے اپنے عمل سے ثابت کردیا کہ یہ لوگ پارٹی کے لئے فائدہ مند نہیں تھے بلکہ مفادات کی خاطر ہمارے مشن کو نقصان پہنچا سکتے تھے۔انہوں نے مزید کیا کہ کسی کے جانے سے پارٹی رکے گی نہیں بلکہ’ سب سے پہلے پاکستان ‘کے نظریے کو ماننے والے مخلص اور پرویز مشرف سے محبت کرنے والے پارٹی راہنماؤں کیساتھ ملکر قومی مشن کو آگے بڑھائینگے ۔